Shillong, Naitung 19: Ka Shillong Lajong ka la jied ïa uwei na la ki jong, kata u Birendra Thapa ban shimti ïa ka kam kum u coach ba thymmai, ryngkat bad u George Vannie Lyngdoh Nongrang u ban long u assistant coach.
U Birendra, uba la tip kum u Biru, u la don bad ka klob ha kawei ka kyrdan ne kawei pat ha ka bynta kaba bha tam jong ki 20 snem, ha kaba u la sdang kum u nongïalehkai shuwa ba un long ruh kum u manager bad u assistant coach.
U la mih noh na ka SLFC ha u snem 2019 ban shimti ïa ka kam kum u assistant coach ha Mohammedan Sporting bad ka Sreenidi Deccan hynrei u la wanphai biang bad ka Lajong sa shi sien ha u snem 2024.
Kumba ka long mynta, ka Lajong ka la sah khlem coach naduh ba ka la ïakhlad noh bad u Jose Carlos Rodriguez Hevia, kaba la dep pynbna ha u bnai Jylliew.
U Birendra u la trei hapoh jong u Hevia bad u don ka jingshemphang kaba jylliew ïa ka kynhun ïalehkai jong ka Lajong baroh kawei, kynthup ïa ki nongïalehkai kiba la kiew lyngba ki kyrdan bapher bapher.
Ka jingtynjuh kaba khraw kaba nyngkong eh jong u kan dei ha ka Durand Cup 2025 – Ka jingïalehkai kaba nyngkong jong ka Lajong ka dang sah sa kumba shi taïew naduh mynta ka sngi. Ha u snem ba la dep ka Lajong hapoh ka jingpynïaid jong u Hevia ka la poi sha ka semifinal ha kaba ka la liem noh ha ka NorthEast United kaba la rah ïa ka nam lahduh haduh kaba kut jong ka lympung. Mynta u snem, ka NEUFC ka la shah kynthup lang ha kajuh ka Group ryngkat bad ka Lajong.
Ha kajuh ka por u George Vannie Lyngdoh u la shah kyntiew kyrdan ban ïa bah lem ïa ka kam bad u Birendra kum u assistant coach.
U George u dang don tang ha ka rta kaba 20 snem shaneng, u la long u assistant coach ha u snem ba la dep jong ka kynhun baar jong ka Mohammedan Sporting kaba la ïashim bynta ha ka Calcutta Football League shuwa ba un wan ïasoh sha ka kynhun coach jong ka Lajong.
Kum u nongïalehkai phutbol ba dang samla, u la ïalehkai na ka bynta ka Sawmer SC, ka Rangdajied United, ka Lajong bad kumjuh ruh ka kynhun ïalehkai U-21 jong ka Jylla Meghalaya ha ka Khelo India Youth Games 2020.
