Kyntiew kyrdan ïa ka Byrnihat Police Outpost sha ka Police Station, ban nang pynjanai ïa ka jingshakri paidbah

Nongpoh, Ïaiong 11: Ban nang pynjanai ïaka jingshakri bad ban pynjan ka jingtreikam bad ki paidbah, ka long ka jingkyrkhu ka ba khraw hadien ba ïaka Byrnihat Police Outpost mynta ka sngi la kyntiew kyrdan noh sha ka Police Station.
Ïa katei ka Police Station la plie paidbah da u Bah Sosthenes Sohtun Myntri ka tnad C&RD ka jylla kum u kongsan haka jingïalang kaba la long mynta ka sngi ha IB PWD ha Byrnihat kaba long ka jingkyrkhu kaba khraw ïa ki paidbah ka thaiñ, namar ka pynsuk ïa ki ban pyndep ïa ki kam kiba ïadei bad ka aiñ bad ka kanun khlem da hap ban leit jngai sha kiwei pat ki thanat pulit. Ka jingdon jong ka Police Station ha Byrnihat kan kyntiew ruh ïa ka jingshngaiñ bad jingïada paidbah ha kane ka thaiñ kaba dang kiew stet ha ka roi ka par.
Ha kane ka sngi, la donlang ki heh pulit kynthup ïa u DIG Eastern Range u V.S. Rathore, u SP ka Ri-Bhoi u Bah Giri Prasad, u Assistant Commissioner u A. Marak, u Officer-in-Charge u Rubul Ali bad kiwei kiwei ki riew rangbah bad nongïalam shnong.
Ka jingkyntiew kyrdan ïa kane ka Outpost ka pyni ïa ka jingthmu jong ka sorkar ban pynkhlaiñ ïa ka rukom treikam jong ki pulit bad ban pynthikna ba ki paidbah kin ïoh jingïada bad jingshakri kaba kham jan bad kaba biang ha ka thaiñ.