Shillong, Naiwieng, 14: Ka Iingbishar Meghalaya High Court ha ka sngi Palei ka la ai jingbit ïa ka jingdawa ban pynrung ïa ka Seng Khihlang Shillong kum ka mamla ha ka Public Interest Litigation (PIL) kaba ïadei bad ka jingpyndonkam ïa ki kyrteng kur ha ka jylla.
Ka Seng Khihlang Shillong, ka la kam ba ka dei ka liang kaba donkam, namar kano kano ka rai ha kane ka PIL (ba la mudui da ka Syngkhong Rympei Thymmai) ka lah ban ktah ïa ka dustur bad rukom pyndonkam ïa ka jait ka khong kaba don ha ka jylla Meghalaya ha kaba ïadei bad ka jingpyndonkam ïa ka kur ka jait.
Ka la ong shuh shuh ba lada ai ïa ka kyrdan kpa sha ki khun kumba la pyrshang ban dawa ha ka PIL, kajuh ka lah ban long kum ka jingtim/jingmana/jingkhang ïa ka iing ka sem (ka jaitbynriew) ha ka ktien khasi kum “Sang”
U nongïasaid aiñ na ka bynta u nongujor da ka jinglong hok um shym la pyrshah ïa ka jingkyrpad haba pyrkhat ïa ka jinglong jong ki mat kiba don bynta ban rai ha kane ka PIL.
“La shah ïa ka aplikeshon [MC (PIL) No.9 of 2025] jong ka kynhun ban kynthuplang. Ïa u nongkyrpad yn bynrap kum u nongshah mudui No.17,” la ong ka Division Bench ba la khlieh da u Chief Justice Soumen Sen bad u Justice HS Thangkhiew ha ka hukum ba la pynmih.
Ka Iingbishar ka la bthah ba ïa ka kopi jong ka writ petition yn sa phah sha u T. Dkhar, Advocate-on-Record jong u nongaplai ha kane ka taiew.
Ka Bench ka la ailad ruh lai taiew na ka bynta u nongshah mudui No 3 ban phah ïa ka jubab shwa ka 31 tarik, Kyllalyngkot, 2026 katkum ka hukum ba la pynmih ha ka 14 tarik, Risaw, 2025.
Ïa kane ka mat la buh sngi ban shong bishar biang ha ka 4 tarik, Rymphang, 2026 bad la bthah ïa ki ar liang ban aiti ïa ki jingkynthoh ha ka por ba dang sah.
