Kynthup ïa ki 4 ngut bad 7 tylli ki shnong, pynkup burom riewshlur ki bor synshar distrik
Ranikor, ‘Nailar, 17: Ha ka sngi jong ka jingrakhe ïa sngi laitluid jong ka Ri India ha ka 15/08/2025, u Sub-Divisional Magistrate jong ka Ranikor Civil Sub-Division, Ranikor lyngba ka District Administration jong ka South West Khasi Hills District, ka la pynkup burom ïa ki 4 (saw) ngut ki riew shlur kiba la pyni ïa ka jingïatreilang kaba skhem bad ki Pulit lem bad ki Border Security Force (BSF) ha kaba la ïoh ban kem ïa ki kai khlaw na Bangladesh.
Ka jingjop ban kem ïa kitei ki kai khlaw ka la long lyngba ka jingïatrei lang bad ka jingïarap kaba kordor na ki paidbah jong ki 7 (hynñiew) tylli ki shnong, kata ka shnong Rongdangai, Khonjoy A, Khonjoy B, Chibak, Kaitakona, Gilagora bad Majisora.
Lah ban pynpaw ruh ba ha ka 10 tarik u ‘Nailar 2025, ha shnong Chibak, kaba dei ka jaka ba don ki mawshun, kine ki saw ngut ki riew shlur ki la shah pynkup burom halor ka jingtrei shitom bad ka jingdonkti jong ki ha kaba la lah ban kem ïa ki lai ngut ki kai khlaw na Bangladesh. Kine ki long: u Inspector Cryster Ch. Marak, CI (S) & Officer In-charge, Ranikor Police Station, UBC/34 bah Dapborlin Wanniang, u Havilder Daniel Sangma, 4th MLP (IR) Bn, No. 4 bad BNC/379 Hellim Sangma, 4th MLP (IR) Bn, No. 4 Platoon.
Kine ki nongtrei Pulit ki dei na ka Ranikor Police Station, South West Khasi Hills District, ki la pyni ïa ka jinglong riew shlur, ka jingshah shkor bad ka jingkitkhlieh ha ka jingshah khot ka kam na ka bynta ka bha ka miat jong ka imlang sahlang. Ha kajuh ka por, ka jingïatreilang bad ki paidbah lem bad ki bor shipai ha khappud ka pyni ïa ka jingïatylli ban ïada ïa ka jingkmen bad ka jingsuk jong ka District bad ka Ri hi baroh kawei.
Shuh shuh na ka bynta kane ka jingpynkup burom ïa ki Pulit, ki BSF bad ki shnong la aiti ïa ki syrnod ne ki momentous da u Dr. Celestine Lyngdoh, MLA jong ka Umsning Constituency bad u bah Pius Marweiñ, MLA/MDC jong ka Ranikor Constituency ha ryngkat ka jingsakhi lang naduh u Additional Deputy Commissioner, South West Khasi Hills District, Mawkyrwat, u bah L.T. Tariang, MCS, u Block Development Officer, Ranikor C&RD Block, u bah S. Marweiñ, MCS lem bad ki paidbah.