NEW DELHI, Kyllalyngkot 10: U General Secretary barim ka Bangladesh Cricket Board bad u CEO barim jong ka Asian Cricket Council, u Syed Ashraful Haque, u la pynpaw ïa ka jingkynthoh kaba jur ïa ka rukom synshar kriket kaba mynta, da kaba kynnoh ba ïa kane ka jingïalehkai ha kylleng ka dewbah, la pynïaid da ki riew saiñ pyrthei kiba duna ka jingsngewthuh shaphang ka kriket.
“Ka kriket baroh kawei ha India, Bangladesh, Pakistan — ha man la ki jaka — la shah knieh noh ha ki riew saiñ pyrthei,” la ong u Haque. “Hato kane kan jin da la jia lada ki briew kum u Jagmohan Dalmia, u IS Bindra, u Madhavrao Scindia, u NKP Salve ne wat u N Srinivasan ruh ki don ha ka bor synshar? Kane kan ym shym la jia satia namar ki dei ki briew kiba la san la rangbah. Ki sngewthuh ïa ka jingïalehkai, bad ki sngewthuh ïa ki jingktah.”
Da kaba shim beit beit ïa ka rukom synshar kaba mynta, u Haque u la ong ba ka jingsynshar kriket mynta ka la hap ha ki kti ki bym don jingtip. “Mynta ka la shah knieh pura. Phi don ïa ki briew ki bym pat ju ktah ïa ka bat. Ha ka khep jong phi, phi don ïa u Jay Shah, u bym pat ju bat wat ïa ka bat kriket ha ki jingïalehkai,” u la ong.
Haba kynthoh ïa ki jingkhot na ki heh ka Bangladesh kiba ai jingmut ba ka kynhun ka dei ban kiar na kaba leit sha India, u Haque u la maham pyrshah ïa ki jingkren khlem jingkitkhlieh. “U sports Adviser jong ngi u ai ka kyrwoh ba ka Bangladesh kam dei ban leit sha India. Pyrkhat bha ïa kane. Kane ka dei ka jingïalehkai World Cup. Kane kam dei ka IPL. Ka IPL kadei ka lympung ïalehkai klob. Kane ka dei ka jingïalehkai bar ri. Phim lah ban kren kiba ïalam bakla kum kine,” u la bynrap.
U Haque u la ai jingmut ban pynkynriah ïa ki jingïalehkai jong ka Bangladesh sha Sri Lanka kum ka jingïapynbeit lada ki jingeh ha ka liang ka bor pahara ki dang ïai bteng. “Lada ki lah ban pynkynriah sha Sri Lanka, ka dei ka jingjop na ka bynta baroh. Lada kim lah, nga artatien la ka Bangladesh kan wan ne em sha India ban ïalehkai ïa kane. Lehse kan pynduhnong ïa ngi ha ka liang ka pisa tyngka. Hynrei ka burom ïa ka ri ka kham heh shibun ban ïa ka jingduhnong ha ka liang ka pisa tyngka,” u la ong.
U la pynpaw ruh ïa ka jingïadei kaba jan bha ha ka histori hapdeng kine ki ar tylli ki ri, da kaba kyntait ïa kano kano ka jingïanujor bad ka jingïadei jong ka India bad Pakistan. “Phim lah ban ïanujor ïa ka jingïadei hapdeng ka India bad ka Pakistan bad ka jingïadei hapdeng ka India bad ka Bangladesh. Ka long kaba pher bha. Ka India bad ka Bangladesh ki long kum ki shi-para. Kane ka la ïaid la slem bah. Ka India ka la wan ban ïalehkai ïa ki jingïalehkai Test ha Bangladesh. Ka BCCI ka la don ka bynta kaba khraw ban ïarap ïa ngi ban ïoh ïa ka kyrdan ha ka jingïalehkai Test.”
Ka jingkren jong u Haque ka la pynmih biang ïa ka jingïakren halor ka jingïakynduh jong ka saiñ pyrthei ha ka jingsynshar ïa ka kriket, ryngkat bad ka jingsngewkhia kaba nang jur ba ki jingpyrkhat ha ka elekshon ki nang pynlong ïa ki rai kiba ktah ïa ka jingïalehkai kriket ha ka pyrthei.
