Shillong, Naitung 09 : U nongïalam jong ka All India Trinamool Congress, Dr. Mukul Sangma ha ka jingïalang paidbah kaba long ha Asanang, West Garo Hills, u Dr. Mukul Sangma u la kren bynñiaw halor ka jinglong jingman kaba ïaid mynta ha ka jylla hapoh ka jingïalam jong ka sorkar jylla.
Da kaba pynpaw ïa ka jingkhuslai jingmut kaba mih bynta hapdeng ki samla, u Dr.Mukul u la ong, “Balei ki (sorkar MDA) knieh noh ïa ka hok jong ki samla kiba dang ap ïa ka kam kaba ki angnud? Baroh kito kiba don ka jingthrang donkam ba kin ïoh ïa ka jingkyrmen, lym kumta ka long kaba isyier. Kaei ka jingthmu jong ki bad kaei kaba ki buh hakhmat?”
Da kaba buh jingkylli halor ka jingpyntrei ïa ka surok na Dainadubi, Damra Mendipathar, Resubelpara, utei u nongïalam ka Liang Pyrshah u la ong, “Kaei kaba pynsangeh ïa ka sorkar jylla na ka bynta bynta ban pyndep noh ïa ka projek jongka World Bank kaba la mynjur naduh u snem 2017? Kane kajuh ka jinglong jingman ka longruh kumjuh ha ka projek jong ka Rongram – Phulbari. Ka projek ba 132 klur bad u kontraktor ba pyntrei ïa ka ruh dei uba pyntrei ïa ka Meghalaya Legislative Assembly. Ka jingpyllait pisa sha u kontraktor ruh kam ïahap bad ka jingïaid ka kam. Na ka dor jong ka projek ba khot tender haduh 77 klur tyngka la dep ban siew katba ka kam pat kam pat poi 30 persen ruh.”
