Shillong, K’Lyngkot 11 : Ka Party Congress ha Meghalaya ka la kynthoh tyngeh ïa ka rai jong ka sorkar pdeng ban bujli noh ïa ka skim 100 sngi ne MGNREGA da ka Viksit Bharat Guarantee for Rozgar and Ajeevika Mission (Gramin) (VB-G RAM G), da kaba ong ba kane ka dei ka jinghiar thma ïa ka kamai laitluid jong ki longkmie.
Haba kren ha ki lad pathai khubor ha kane ka sngi Saitjain u Chairman jong ka Congress Social Media Cell Bah Langkupar War u la ong, “Ka BJP ka la thombor ïa ka burom jong ki kynthei da kaba pynpra ïa ka MGNREGA, kaba la ai bor ïa ki kynthei bad ai ïa ki ïa ka jinglaitluid ha ka ïoh ka kot bad ka jingshngain ha iing ha sem.”
Une u nongïalam ka Congress u la ong ruh ba ki longkmie ki pynlong haduh 60 persen na ki nongtrei ïa ka skim MGNREGA bad kumta u la kynthoh ïa ka sorkar pdeng kaba thmu ban pynduna ïa ka bhah jong kane ka skim.
U la ïathuh ruh ba katkum ki jingkhein ba ki ïoh, ka jingmang pisa ka la duna nakaba donkam. Katkum ka jingong jong u, ha u snem 2021-2022 la mang 73,000 klur tyngka na ka 98,000 klur tyngka kaba donkam, bad ha u 2023-24 pat la mang 60,000 klur tyngka na ka 1lak klur kaba donkam.
Shuh shuh u ong ruh ba kane ka jingpynkylla da kaba buh kyndon na ka bynta ka jingpyntreikam ia kane ka skim kynthup naduh ka mang pisa kaba long beit thik tang katto kumba la mang, ka jingpynkhia ïa ka lyngkor ha ki sorkar jylla bad ka jingpyndonkam da ki teknoloji khlem da kynthup ïa ki nongtrei kiba kham hapoh.
U la kynnoh ruh ba kine ki jingpynkylla kin ktah tyngeh ïa ki nongkyndong khamtam ha ki jylla kum ka Meghalaya, kaban nang pynhiar shuh shuh ïa ka jingduna ki sngi ban trei, ka jingslem ban ïoh bainong trei bad ruh kan ktah ïa ka jingnang kiew ka jingdon kiba duk ba tlot.
