Kynthoh jur ka JSU ba u MR u buh ïaka mat ILP sharud

Jowai, Nailur 06: Ka Jaiñtia Student Union (JSU) Seng kmie ka pynpaw ka jingsngew bynñiaw bad pynrem jur ïaka jinglong arsap u Myntri Rangbah ka jylla u Conrad K Sangma namar na ka por shaka por uba leit ban kynduh ïa Amit Shah sha Delhi um juh kren ne dawa na ka sorkar India ban pyntreikam noh ïaka ILP hapoh ka jylla bad kane ka pyni shai kdar ba u Conrad um don mon satia ban pyntreikam ïaka ILP hapoh ka jylla bad un suidñiew satia ïaka sur bad ka jingdawa u paitbah ka Bri u Hynñiewtrep ban pyntreikam ïaka ILP hapoh ka jylla.
Ka JSU ka lah ong ruh lyngba u samla Treibor R Suchen General Secretary ka seng ba ka jingleh u Conrad ka long ka bym lah ban pdiang namar lah shu pass ïaka resolution ka ILP hapoh ïing Dorbar Thawaiñ kadei tang ban pynpjah ïaka jingïakhih ki sengbhalang bad ki paitbah ka bri u Hynñiewtrep ban dawa ïaka ILP ha ki snem kiba lah dep bad mynta kane ka sorkar hapoh ka jingïalam u Myntri Rangbah ka jylla u Conrad K Sangma um don por ban ïakren ïaka mat ILP bad u Home Minister ka Ri India hynrei u lah pynlut por ban leit sha Delhi ban ïakren ïaka ka kam Khalai hapoh ka jylla bad ka Ri India hi baroh kawei.
Ka seng kan ym sngap jar ïaka ne ka jingleh kuman ka sorkar bad kan sa shong pyrkhat bad kiwei ki paralok sengbhalang bad shen yn sa lum sa lang ïaki nongsynshar shnong bad Elaka ha ryngkat u paitbah ban dawa jur ban pyntreikam ïaka ILP hapoh ka jylla, la bynrap u President ka seng u samla Jersom Shylla.