Kynthoh jur ka HYC ïa ka jingkren u Symbud Myntri Rangbah halor ka MRSSA, Bill

Shillong, K’Lyngkot 05 : Ka HYC ka la kynthoh jur ïa ka jingkren jong u Symbud Myntri Rangbah ka jylla, Bah PrestoneTynsong ba ki ailad ïa ka Meghalaya Residents’ Safety and Security (Amendment) Bill, 2020 ba kan “ïap hi,” da kaba kynnoh artad ba ka daw baroh ka dei ka jingbymlah jong ka sorkar barim.
Katkum ka kyrwoh ba la phah da u President ka HYC u Roykupar Synrem la ong ba katei ka jingkynthoh ka dei ka jingkynnoh ïalade ïa ka jingbymlah jong kane ka sorkar ba mynta.
Shuh shuh u ong ruh ba ka aiñ kam ju jah hi dalade. U ong ba ka lah ban ïaid shakhmat da ka jingthmu ban thaw ain lane iehnoh lyngba ka jingbym pyntreikam ïa ka.
“Ïa ka Meghalaya Residents’ Safety and Security (Amendment) Bill, 2020 la wanrah ha ka Ïing Dorbar Thawaiñ ha u bnai Lber 2020 hapoh ka jingïalam jong u Myntri Rangbah ka Jylla ba mynta. Hynrei ha u Naiwieng 2023 ka tnad Kampohiing jong ka Ri ka la pynphai noh ïa kane ka Bill na ka bynta ban bishar bniah. Naduh katei ka por hi, ka sorkar ka la kular ïa ki paidbah ba kan bishar biang, ban syllok bad ki stad aiñ bad ki kynhun bapher bapher. Hynrei watla ka don ïa ka jingbun paid bad shibun ka por pynban kam shym la wanrah satia ka jingpynkylla ïa ka Ain (Principal Act) hapoh Iing Dorbar Thawain ka jylla,” ong u President ka HYC ha ka kyrwoh.
Ha kajuh ka por u la kynthoh kylla ruh ïa kane ka sorkar ba mynta ba ka tynrong pynban ïa ka jingkynnoh sha ka sorkar barim. “Lada don kino kino ki jingduna ha ka aiñ, lada ki don, lah ban pynbeit ha kano kano ka por ha ka por ba synshar ka MDA. Ka jingbym lah ban leh kumta kam dei ka histori; ka dei kaba mynta.”
Utei u heh HYC u la ong ruh ba ka jingkam kaba man ka sorkar pdeng kam shym la kyntait’ ïa ka Bill ka ïapher na ka jingpdiang kaba mynta ba la shah ïa ka ban kut noh. “Kine ki nongrim ki bym ïahap ki pynskhem ïa ka jingsngewthuh jong ka jingbym lah ban rai bad ka jingbym shimkhia halor ka mat kaba ktah ïa ka jingshngaiñ jong ki trai ri trai muluk bad ka jingshong suk shongsaiñ.”
Ka HYC ka la maham ba ka jingailad ïa kane ka aiñ ba kan jah noh khlem da don ba bujli ka long kumba pyni ïa ka “dak kaba ma ba ka jingïada ïa ki trai ri trai muluk ka long kaba lah ban ïapeiñ, kaba lah ban pynkynriah, bad kaba lah ban pynlut ha kaba kut.”
Kumta halor kane, na ka liang ka HYC ka dawa ïa ka jubab kaba shai halor kane ka bynta na ka sorkar jylla. Katkum ka jingong jong u, ka HYC kan buddien ïa kane ka kam lyngba baroh ki lad synshar paidbah bad riti synshar haduh ba ka sorkar kan ai ïa ka jubab kaba shai.