Shillong, Risaw 03 : Ka Meghalaya Medical Service Recruitment Board (MMSRB) ha ka sngi Palei ka la kyntait war ïa ka jingkynnoh da ki samla wad kam bad ruh ki sengbhalang haba ïadei bad ka result kaba la pynbna na bynta ka kam staff nurse bad ANM.
Halor kane, na ka liang ka Member Secretary ka MMSRB, Dr. L Mylliem Umlong ka la ong ba ki la shah kynthoh tyngeh haba ïadei bad ka jingpynlong ïa katei ka eksam thung kam kynthup ïa ka jingkynnoh ba ki don ki kyrtong kiba pep hynrei ki paw kyrteng pat.
“Ïa baroh kine ki jingkynnoh la dep ban kyntait da ka MMSRB,” ong ka Dr. Mylliem Umlong.
Haba kren bad ki lad pathai khubor, la ïathuh ba na bynta ki 164 tylli ki kam ba lait jong ki staff nurse ki la ïoh pdiang haduh 5603 tylli ki nong aplai bad na bynta ki 78 tylli jong ka ANM pat ki la don haduh 706 tylli kiba aplai. Ka la ïathuh ba ïa kine ki kyndon la dep ban bud pyrkhing katkum ka bhah kam ryngkat ka kyrdan bad ki kyndon pynjlan rta.
Shuh shuh ka la ïathuh ba hadien ka written examination, na ka liang ka MMSRB ka la jied 495 ngut ki kyrtong na bynta ka staff nurse bad 263 ngut pat na ka bynta ki ANM katkum ka jinglah jong ki.
“Ka jingdon ki kyrtong ba shah jied ka long lai shah na ka jingdon ki kam kiba lait ha baroh ar tylli ki kam,” ka la bynrap biang.
Haba ïadei pat bad ka jingkynnoh ba ka don ka jingleh bakla, ka Dr. Mylliem Umlong ka la ong, “Hadien ba la pynbna ïa ki kyrtong kiba shah jied, ka la mih ka jingpyrshah khamtam eh da kaba ong ba katei ka thup kam dei satia katkum ka State Reservation Policy. Ka MMSRB ka la mynjur bad ki jingdawa kumta ka la pynmih biang da kawei pat ka thup kyrteng kaba thymmai da kaba kdew katkum ka jingïoh mark jong ki kyrtong.”
Na ka liang ka Dr. Mylliem Umlong ka la pynshai halor ka jingkynnoh ba ki don ki roll number kiba mih arsien bad ïa kane ki la dep ban pynbeit da kaba ai nuksa ba ha ka jaka ba mih arsien u No.1040 la dep ban pynbeit. Ka la ong ba uwei u Roll Number 1040 u dei ba ïoh 58 mark bad uwei pat uba la dep ban pynbeit dei u Roll Number 0140 bad ïoh 60 mark.
Halor ka ishu ba don ki kyrtong ba paw kyrteng kiba khlem thoh eksam ka Dr. Mylliem Umlong ka la pynshai ba kaba pass ïa ka eksam kadei na ki ANM kaba dei ka kyrtong na rilum Garo. La ïathuh ba katei ka kyrtong ka la dep ruh ban phah da ka jingthoh halor katei ka jingsngewthuh bakla sha ka Board.
“Na ka liang ka MMSRB ka la ieng skhem ha ka nongrim ban wanrah ïa ka thungkam thungjam kaba khuid ba suba bad kaba shai bad ka jingthung kam ïa ki kyrtong ba la jied ruh kadei ban long da kaba bishar bniah ïa ki kot ki sla. La dep ruh ban thaw ïa ka Grievance Cell ban bishar ïa kino kino ki jingujor haba ïadei bad kane,” ka la bynrap biang.
