Nongstoiñ, Nohprah 19: U bah B.Sunn sordar jong ka shnong Mawrang (Rambrai) hadien ba u bah Phomdarship u ba kam kum u Sub sordar bad u Dralling Paliar, ki la kynnoh ba u la pynthud ïa ka jingpynpoi um bam um dih ha baroh ki long ïing jong katei ka shnong, ïa kaba la pynmih ruh ha ka kot khubor u Mawphor ha ka 29 tarik u Naiwieng ba la dep, kumta u la pynpaw ïa ka jingsngewlyngoh bad ka jingbym sngew ïahap satia halor katei ka jingkynnoh khlem nongrim jong ki.
Kumta na ka liang utei u sordar ha u kyrwoh ba u la pyllait mynta ka sngi u don ban pynshai ba ka jingkynnoh ba ïa u bah Dralling paliar u ba dei u Chairman jong ka VWSC bad u bah Dominik Marweiñ u ba dei u secretary, la weng noh namar ka jingbym trei kam shuh jong ki wat hadien ka jingshah ujor ba la pynpra ïa ka top um kat haduh ba ki briew napoh ka ophis PHE, ki la hap ban wan sorjamin bad peit bniah ïa ka jinglong jingman, kaba la buh jingeh ha kaba pyntrei ïa katei ka skhim sam umbam umdih kaba la pyntrei lyngba ka skhim jong ka sorkar pdeng ka Jaal Jeevan Mission.
Kumta hadien ba ki paitbah nongshong shnong ki la mad jingeh ka Executive Dorbar jong ka shnong Mawrang, ka la shong bad pyrkhat sani ba halor katei ka kam bad ha ka la thung thymmai noh da u Khosponter Lyngkhoi kum u Chairman bad u Pyrshang Maram kum u secrtary ka VWSC, khnang ba ka jingpyntrei ïa katei ka skhim sam umbam um dih kan ïaid beit.
Nalor kata u la pynshai ruh ba ha kaba ïadei bad ka jingkam jong u Phomdarship ba u dei u Sub sordar, na ka liang ka Executive Dorbar jong ka shnong kam don jingtip ei ei bad halor kane ki dkhot ka Executive Dorbar ,ki la dep pan jingshai na ka ophis u Syiem ka hima Rambrai bad na ka liang ka ophis jong u syiem ha ka 14 tarik mynta u bnai Nohprah, katkum ka Notice kaba RS/Genl/II/2022-23 kaba dated Rambrai 14/12/2023, kam lah ban diang ne ithuh ïa ka jingkam jog u Phimdarship Nongphud kum u Sub sordar jong ka shnong Mawrang.
Utei u sordar u la pynshai ruh ka jingkam jong kitei ki ar ngut ba ka jinglum ïa ka pisa kaba 5 % na ka bynta ban siew ïa ka bai jaka ba buh ïa ka top um, na ka liang ka VWSC bad ka Dorbar shnong kam don jingtip ei ei bad katei ka jing kynnoh ka long ka bym don nongrim haei haei ruh.
U la ong ruh bah nalor ka jingkynnoh ba ka la don ka jingpynwit ha kaba ïadei bad ka jingpyllait ïa ka bill jong u kontraktor uba pyntrei ïa ki pipe line, na ka liang jong u sordar bad ki paitbah shnong kim don jingtip ei ei ruh em. Hynrei ka dei tang ka jingkwah jong kitei ki ar ngut ban pynbud nam bad pynthohbria ïa u sordar bad ki paitbah jong ka shnong baroh kawei.
