Shillong, Nailar, 16: U MP ka Congress na Tura u Saleng A. Sangma u la kyntait war ïa ka jingkam da ka BJP ba ka la ai jingkyrshan ïa u ha ka elekshon Lok Sabha bad u la kob ruh ïa ka National People’s Party (NPP) lada ka nud ban kynjat noh ïa ki arngut ka BJP na ka Sorkar MDA.
Ha ka jingïakren bad ki lad pathai khubor ha ka sngi Thohdieng, u Saleng u la ong, “haba u Bernard u kren eiei, hato ki paidbah kin shim ba ka dei beit ka jingshisha? Hato phi tharai ba ka BJP ka la pynlong MP ïa u Dr. Ricky ne ïa nga ban pynlong MP? Ka BJP bad ka Congress ki long kum ka um bad ka ding. Ngin ym ïakyrsum lang lano lano ruh lymne ngin ym ïatreilang hi ruh lano lano. Nalor kata, nga tharai ki la khleh biej namarba nga la jop kum u MP.”
Haba pynpaw ba ka BJP bad ka NPP ki dei kiba ju ïatreilang, u MP ula ong, “haba phi leit sha Delhi sa kylli ïano ïano khamtam ïa ki Myntri Sorkar, ki shim ba kane ka jylla kum ka jylla ba la synshar da ka NDA. Namarkata, ha kano ka jingphohsniew ba ngin ïoh ïa ka jingkyrshan na ka BJP? Hato phi lah ban ïathuh ïa nga?
Une u MLA barim ka Gambegre u la ong ba u la pan jingkyrshan na ki nongïalam shimet hynrei ym na ka BJP ha ka elekshon Lok Sabha.
Da kaba kdew kyrteng katto katne ngut ki nongïalam, u la ong, “nga la leit sha ki katto katne ki nongïalam, nga la leit ruh sha ki nongïalam ka NPP ban pan jingkyrshan ïa nga. Kam mut pat ba ki ai jingkyrshan ïa nga da ka jingbthah jong ka party.”“Ka BJP kam shym la ai jingkyrshan ïa nga, bad kan ym kyrshan ïa nga lano lano ruh,” la ong shuh shuh u Saleng.
Haba kylli, u MP ka Congress u la ong, “lada ka NPP ka shlur, hato ka nud ban kyntait noh ïa ki arngut ki MLA ka BJP. Kyntait shwa ïa ka BJP, beh shwa shabar ïa kine ki arngut ki MLA ka BJP bad ngeit ïa kaba la ong ki nongaiktien jong ki. Hato ki nud ban beh ïa ki arngut ki MLA ka BJP na ka liang synshar.”
“Kim (NPP) donkam hi ruh ïa kine ki arngut (MLA BJP) namarba ki la don 43 ngut. Kim donkam shuh ïa ka jingkyrshan ka BJP. Lada ki shlur ban kynjat, ong shwa ïa u Rakkam ban kynjat ïa ki shabar, nangta sa ong ïa ki ban ïakren shaphang jong nga,” la kob u Saleng ïa ka NPP.
