Kyntait u Rakkam ba u kren ki kyntien pyrshah ne isih jaitbynriew ha ka por ilekshon

Shillong, Jylliew 17: U Myntri ka tnat Pule Puthi bad u nongïalam ka National People’s Party (NPP) u Rakkam A Sangma u la kyntait ba u kren ïa ki kyntien pyrshah ne isih kiba ktah ïa ki jaitbynriew ha ka jingleit ïalap ilekshon ha ka Lok Sabha ba dang shudep bad u la pynpaw ïa ka jinglong donkam jong ki Khasi bad Garo ban tip ïa ki kyntien jong kiwei.
Kane ka la wan hadien ba seng kaba don ha ka liang pyrshah ka Voice of the People Party (VPP) ka la rai ban ujor da ka First information report (FIR) pyrshah ïa u Sangma da kaba kynnoh ba u la aiding ïa ka jingkwah ban wanrah ka jingïapher bad isih jaitbynriew hapdeng ki Khasi bad ki Garo.
Ka FIR kan long halor ka nongrim ka video jong u Myntri ka tnat Pule Puthi kaba saphriang hapoh ka social media, katba u dang kren ha ka jingïalang kaba heh ha ka ktien Garo ha ka por ba ïalap ilekshon.
Ka VPP ka la ong ba kam pat lah ban pynshisha ïa ka jingshai jong katei ka video jong u Myntri ka tnat Pule Puthi ha kaba u la ong ba ki A’chik kin sa shah pynjah lada ka VPP ka wan ha ka bor ha Meghalaya.
Haba ïakren bad u Rakkam A Sangma u la ong, “Nga kyrmen ba ka VPP kan ïoh ka video kaba pura bad ban pynbeit ïa ka jingpynkylla ïa ka ktien jong nga.”
“Kam don ka jingbakla hynrei ha kaba khatduh ka jingphiah bad ka communal politic jong ka VPP da kaba ïatylli na ka bynta ka Ma’am Ampareen (candidate) kum ka MP ka Shillong,” u la bynrap.
U Myntri u la ong ba ka VPP kadei ban ujor hakhmat u returing officer ha ka por ilekshon hynrei mynta ka ilekshon ka la kut.
“Namar kata ka long kaba donkam ban tip ïa ka ktien jong kiwei,” u la bynrap.
U Nongaiktien ka VPP u Bah Batskhem Myrboh u la ong ba ka party ka la rai ban ujor da ka FIR pyrshah ïa u Myntri bad kyrpad ïa ka aiñ ban tohkit ïa kane ka kam khlem jingtieng ne shah liang.
U la ong ba lada lap ba kadei kaba shisha katei ka jingkren, u Sangma u dei ban hiar shuki da kaba don burom na ka daw ba u bet u symbai ka jingïa isih hapoh ka jylla.