Shillong, Nailur 20 : U President jongka Bharatiya Janata Party (BJP) u bah Ernest Mawrie mynta ka sngi ula kyntait ban ai kano kano ka jingkynthoh halor ka jingbyrngem u National Vice President ka BJP u Chuba Ao ban weng noh na kane ka sorkar MDA hapoh shibnai.
Haba la kylli halor katei ka jingkynthoh u Ao u bah Mawrie u la ong “ Ka dei ka jingkren jongu shimet ngam tip u mut kumno da kaba ong shibnai, u kham tip bha ma u”
U bah Mawrie u la ong lada ka don ka jingbym ïa sngewthuh jingmut hapoh ka party halor kane ka jingthmu ban weng na ka sorkar, ïano pat yn ai jubab ba u ong ba ka party ka ïa tylli.
“ Ha ka jingshisha ka don ka jingsngewkhia na ka liang ki dkhot halor kiba bun ki mat bad kum ki dkhot ki don ka hok ban pynpaw sha ki nongïalam ka seng kmie” ong u bah Mawrie.
U la ong shuh shuh ba u National General Secretary u B.L Santosh ula kdew bad pyni ïa ki nongïalam ka party ha kane ka jylla na ka bynta ban thaw ïa ki committee ban pynkhlaiñ ïa ka party. Ym tang u Santosh hynrei na ka por sha ka por ki nongïalam na ka seng kmie kin wan ban ai jingmut kumno ban pynkhreh na ka bynta ka election MLA 2023.
U bah Mawrie u la ong shuh shuh ki nongïalam na Delhi ki phai khmat sha ka jylla Meghalaya bad ki peit ban jied ruh ïa ki kyrtong ki ban jop ha kane ka kynti. Namar ka don ka jingthmu ban ïoh ïalam ïa ka jingsynshar ha ka jylla. Kumta ki kyrtong ka BJP ki hap ban trei shitom bha namar la peitngor bad bud dien bha ïa ki naduh Delhi.
