Khliehriat nailur 1: U bah Reachingson Saingshai, u rangbah na East Jaintia Hills District uba la dep ban buh haduh lai tylli ki RTI ha kaba ïadei bad ki post ne ki kam kiba lait ha DSC East Jaiñtia Hills District, u la pynpaw ka jingsngew phylla bad sngew lyngngoh shikatdei eh namar ka jingkyntait u PIO u Manish Kumar, IAS uba dei leh ïa ki kaiphot RTI.
Utei u rangbah uba buh RTI mynta ka sngi u la leit ban buddien ïa ka RTI kaba lai kaba u la buh naduh ka 31 tarik u naitung 2025 ha kaba ïadei bad ka kam ba lait, ka post Demonstrator kaba pynlong ïa ka interview mynta ka sngi, u la ong ba ïa kane ka interview ruh la khot pynlong mynta ka sngi dei lyngba ka jingbuh RTI jong u bad kane ka dei ka post kaba naduh u snem 2019, ïa ka exam interview ruh la pynlong ha ophis DRDA ym ha ophis u Deputy Commissioner.
“Nga sngew phylla ha ka jingïakynduh ïa u PIO, u Manish Kumar, IAS uba dei ruh u SDO Sadar East Jaiñtia Hills District namar haba ïakren bad u ha kaba ïadei bad ka RTI ba nga la buh u la ong pynban ba un don jingtip eiei ïa kane, te mano pat ba dei uta uba pynkhreh ïa ka jubab RTI lada ym dei ma u kumba la pynkhamti ïa kane ka kam ha u kum u PIO? kaba phylla shuh shuh ka dei ba u la shon dur pynban ïa ka shithi ba aplai RTI ma nga, ha kaba ha ka jingshisha kane ka shithi ba aplai RTI lei ka dei kaba la don ha ka file ha ophis jong u, te kane ka pynlyngngoh ïa nga ba uei pat uta u ba pynkhreh ïa ka kaiphot jubab RTI lada u
ym dei u PIO” ong u bah Reachingson Siangshai.
La ong ruh ba ïa ka RTI kaba ar kaba la buh naduh shuwa katei ka RTI kaba lai, ïa kane ruh u bah Saingshai um pat shym la ioh pdiang ïa ka kaiphot ne jubab bad u la byrngem bad ong ba halor ka RTI kaba ar um donkam shuh ban leit iakynduh ïano ïano hynrei un leit ban buh noh da ka jingujor sha ki bor kiba kham shalor.
“Haba nga phone ïa u PIO, Manisha Kumar u ong pynban ïa nga ba ngan ïakynduh ïa u DC, balei ngan shu leit kynduh ïa u DC namar um dei u DC uba peit ïa ka RTI, te kumno kumta shiphang la phah ïa nga sha u PIO ,shiphang sha ka Dealing assistant, shiphang sha u DC, balei ka jia kumne ïa ki bor synshar district hangne ha kaba ïadei bad ka exam DSC” ong u bah R.Siangshai.
“Shuh shuh haba iakynduh bad kiba wan ialeh ïa kane ka exam interview ha kaba iadei bad ka post Demonstrator kaba katkum ka jingpynbna ne ka notification kaba pynmih myn ha ka taïew ba la leit, ka mih kane ka notification ruh dei namar ka jingbud dien jong nga lyngba ka RTI, te ïa kane ka post ba pyn ialeh exam mynta ka sngi ka dei ka post kaba sahteng kaba naduh u snem 2019, nga ioh jingtip ruh ba ïa kane ka exam interview la pynlong ha ophis DRDA ym ha ophis u DC, ki nongwan interview ki iathuh ba ki khlem ioh kano kano ka jingpyntip kaba long official hynrei ki shu ioh jingtip pateng lyngba ki paralok, kane ka pyn suba jur ba imat ka la don ka jingpynkhreh na ka bynta ki briew ba ki la mut ban thep kam” bynrap u bah R.Siangshai.
