Shillong, Jylliew 15 : U Myntri ka tnad pule puthi u ma Lahkmen Rymbui mynta ka Sngi Balang ula kyntait ïa ki jingkynnoh ba ka don ka jingor pait ha ka jingtei ïaka ïing College ha Patharkhmah Model Degree College, Ri Bhoi District da kaba u ong ba ka jingorpait ka dei na ka jaka ba bteng ïa ka Building jongka College.
ïa kane ka skhim la tei na ka skhim Rashtriya Uchchatar Shiksha Abhiyan (RUSA) bad ka thong ka long ba kane ka Collge kan long ka Model College bad ïa u maw nongrim la plie ruh da u Myntri Rangbah duh ka ri u Narendra Modi ha u Rymphang 2019.
Ha kine ki khyndiat sngi la mih ki jingkynnoh ba ki don ki jingorpait ha katei ka ïing college. Hynrei na ka liang u ma Lahkmen u la ong nalor bym pat dep tei ïa kane ka college bad katei ka jingorpait ka dei na ka jingbteng ïa kawei pat ka bynta jongka ïing college. Ula ong halor ka jingkynnoh ba ym shym la shna ïa ka lift ruh u la ong ba ka daw ka long bym don bor ding electrict bad na ka bynta kata ka surok ruh ym don ka jingmang pisa ban shna ïa kata ka surok ruh na ka liang jongka skul bad kam don kata ka jingmang pisa lang ïa ka surok ha kane ka projek.
Ha ka jingshisha na ka liang ka sorkar arsnem mynshwa ka la ïakren bad ka sorkar pdeng ban mang pisa na ka PMGSY ban shna ïa ka surok ban poi sha katei ka college hynrei na ka liang ka sorkar pdeng kala pynshai ba ka surok kaba tang hapoh 5 Km kam lah ban ïoh ïa ka PMGSY skhim.
U la ïathuh dang shiphew sngi mynta u Myntri Rangbah u Conrad K Sanma ula khot ïa ka jingïalang bad la rai ban shna ïa ki surok ba bha ban poi sha ki College bad kane kam dei tang ïa ka Patharkhma Model Degree Colege hynrei ïa ka Rongjeng College of Urban Planning and Architecture bad ïa ka Captain Williamson Sangma Technical University ruh.
U la kular ban wad lad ban ïoh fund ban shna ïa kine ki surok.U ma Lahkmen u la pynpaw ba wat la katta ruh ka sorkar kan peit bniah bha ïa ka jingtei shwa ban pyllait ïa ki bill jong u Contractor. Ha kajuh ka por ka sorkar ka dang ïakren bad ka tnad MeECL na ka bynta ban pynpoi bor ding sha katei ka college.
