Shillong, Jymmang 12: U MLA ka Umroi Constituency Bah George B Lyngdoh ula kyntait ïa ka jingmih khubor ba u don ka jingthmu ban phet noh na ka All India Congress Committee (AITC) bad pyniasoh sha kiwei pat ki seng saiñ pyrthei hashuwa ka elekshon MLA 2023.
“Ngam don satia kano kano ka jingthmu ban leit iasoh sha kiwei pat ki Seng. Nga kren hangne tang na ka bynta ïalade bad ym na ka bynta kiwei pat ki para MLA” ong une u MLA uba dei u Vice President ka AITC Meghalaya.
U Bah George uba dei ruh u Chief Whip ka Liang Pyrshah ha Ïingdorbar Thaw Aiñ ka Jylla, ula pynpaw ba u shem ïa kane ka jingthoh ha ki lad pathai khubor ba ki long thamula bad kiba ïalam bakla.
“Ka long ka jingshisha ba ki la don ki seng saiñpyrthei kiba la wan ban ïakren bad nga ryngkat bad ki jingtyrwa bad ki jingpynbiej kiba bun rukom. Kane ka la ïaid mynta la katto katne bnai. Hynrei kaei kaba nga sngewthuh ka long ba kane ka jingtyrwa bad jingpynbiej ka pynpaw ïa ka jingbym kheiñ snep jong kine ki seng saiñpyrthei ïa la ki jong ki nongïalam ha ki shnong bad ki paidbah nongkyrshan ki jong ki. Ka pyni ruh ba kine ki seng saiñpyrthei ki long kiba kloi ban hiar haduh kano kano ka kyrdan ruh tang ban tan ïa ki MLA kiba mynta” ula ong.
Une u MLA ka AITC ula ong “Ki jingtyrwa kiba pyrshang pynjawdud bad pynbiej ki dei tang ki jingthmu ban pynsngap jar ïa ki nongïalam kiba ju kren barabor na ka bynta ki jingeh jong ki paidbah. Da kaba leh kumne, ki thmu ruh ban pynklet ïa ki paidbah ïa ki jingeh kiba ki la mad namar ki kam be-aiñ bad ka jingbym ïaid beit ka synshar ka khadar kiba ngi sakhi hapoh ka jingïalam jong kane ka sorkar ba mynta”.
“Halade hi nga shim ba ka saiñ hima sima ka dei ka kam kaba kyntang na ka bynta ban ai ïa ka kti kamon kti ka diang ha ka jingpyrshang ban pynurlong ïa ki jingangnud jong ki paidbah. Ngim dei kiba lalot shuki ha Secretariat” ula bynrap
. Haba pynpaw ba ka jingdon jong u kum u MLA ka long ba kren ïa ki jingeh jong ki paidbah bad ïa ka jingbym ïaid beit ka synshar ka khadar, u Bah George ula ong “Ngi la ïohi ïa ki jingdkoh ha ka jingsynshar la jan man la ka sngi. Kane ka sorkar kaba mynta ba ïadonkti lang ki seng saiñ pyrthei bapher bapher hapoh ka lama jong ka Meghalaya Democratic Alliance ka hap ban shim jingkitkhlieh halor kine ki jingdkoh bad jingbym biang ka synshar ka khadar, bad na ka bynta ka jingpynbud nam ïa ka kyrteng jong ka Meghalaya”.
Une u Heh ka AITC ula ong “Kum ka Liang Pyrshah, ka AITC kan ïai bteng ban kren na ka bynta ki mat kiba ktah ïa ki paidbah bad ban long ka sur jong ki nongshong shnong. Namar kata, nga kwah ban pynshai biang sa shisien ba baroh ki jingmih khubor ba la kam ba ngan leit pynïasoh noh sha kiwei pat ki seng ki long kiba bakla bad kiba ïalam bakla”.
“Ngan ïaineh ha ka AITC bad ngam don jingthmu eiei ban leit pynïasoh sha kiwei pat ki seng” ula pynkut.
