Shillong, Jymmang, 27: U James Pangsang Kongkal Sangma ha ka sngi Thohdieng u la kyntait war halor ka jingkynnoh ba u donkti lang bad uwei u nongkhaii dewïong na ka jylla Assam u Balwant Soni ban khaii tuh ïa u dewïong na Gasuapara Land Custom Station, South Garo Hills District sha ka ri Bangladesh.
Kane ka jingshah kynnoh jong u Myntri ka Sorkar Jylla u James PK Sangma ka la mih ha kawei na ki lad pathai khubor na ka jylla Assam kaba la saphriang ha ka Social Media ha ka sngi Palei kaba pyni ba u Balwant Soni u dei u Khlieh (Kingpin) jong ki Mafia khaii dewïong be-aiñ na ka jylla Meghalaya ban pynïaid ïa u dewïong uba mih na kane ka jylla lyngba ka Gasuapara Land Custom Station.
Kane ka lad pathai khubor na Assam ka la sei madan ruh ban kynnoh ba ka longing u Balwan Soni ka don ka jingïadei kaba jan bha bad u Myntri ka Sorkar Jylla u James PK Sangma uba dei u hymmen jong u Myntri Rangbah ka Jylla u Conrad Kongkal Sangma.
“Baroh ka dei tang ka jingkynnoh hynrei ki bym lah pat ban sei ïa ki sakhi sabut kiba pynshisha,” ong u James ha ka jingïakren bad ki lad pathai khubor.
“Ki jingkynnoh ki lah ban mih na ka mon bad na ka diang, ngi tip lut baroh bad kam don eiei satia bad ngam pat ïohi hi ruh wat ïa kata ka Video hynrei watla katta nga pynthikna ba ngam don bynta eiei (bad ka jingshah kynnoh khaii tuh ïa u dewïong) bad kine ki dei tang ki jingkynnnoh suda,” la kren saitkhuid une u Myntri ka Sorkar MDA.
Haba kylli u la ong, “namarba ka elekshon ka la jan, ngi ju khmihlynti ba kin don beit kum kine ki jingkynthoh bad ki jingkynnoh bad ki jingkynnoh lamler ki bym don nongrim kin nang ïai mih shuh shuh ha ki sngi ki ban dang wan.”
