Kyntait u DyCM ïa ka jingkynnoh ba suki palat ka jingpyntrei ïa ka surok Shillong – Dawki

By Mawphor Editor On Oct 13, 2025

Shillong, Risaw 12 : U Symbud Myntri Rangbah ka Jylla ba peit ïa ka tnad PWD, Bah Prestone Tynsong u la kyntait ïa ka jingkynnoh bad ka jingkynthoh kaba bun ba ka jingpyntrei ïa ka surok Shillong – Dawki kala suki shaba palat pud.
“Ki paidbah bapli lehse ki shim beit naduh ba pyntrei ki kompeni ba mynshwa. Kadei ka jingshisha ba kham hashwa ki don da kiwei pat ki kompeni phin ong naduh ka Package 1, Package 2, Package 4 bad Package 5. Ithuh hi ba ka jingpyntrei ha kato ka por ngi ruh ngim hun bad khatduh ka NHIDCL ka pynsangeh noh ïa ka kontrak kaba ka la ïa soi soskular bad ki kompeni bapher bapher,” ong u Symbud Myntri Rangbah ka jylla.
Shuh shuh u la ïathuh ruh ba hadien ba la ïoh ïa ki kompeni ba thymmai naduh package 1, package 2, package 4 bad package 5 ka kam ka la ïaid kham stet.
“Lada kren ïa ka jingshisha ki paidbah ki kynnoh ba ka slem ka dei ïa ka jingpyntrei ki kompeni kiba ha shwa kiba trei nyngkong kiba imat ki kham shem jingeh ban trei ïa ki projek kiba heh khamtam ha ka jylla Meghalaya jongngi,” u la bynrap biang.
Hynrei, u la ong ba mynta pat naduh ba ka NHIDCL ka la bynshet ha kiwei pat ki kompeni ban pyntrei ïa kane ka surok bah ki la ïohi ïa ka jingïaid stet jong ka kam.
Lah ban kdew hangne ba ha ka review meeting kaba dang shu lah shem mynta ka taiew hapdeng ka sorkar jylla bad ka NHIDCL, ki ophisar ka tnad PWD kumjuh na ka kompeni bad ki bor sorkar, la rai ba ka jingpyntrei ïa ka package 1 kaba dei ka surok fourlane naduh Rilbong ter ter haduh Upper Shillong yn pyndep noh ha u Nohprah mynta u snem.
Ym tang katta, na ka bynta ki surok kiba sah kata naduh package 2 ter ter haduh package 5 na ka liang u Symbud Myntri Rangbah u la pyntikna ba ïa kane ka surok ki buh thong ban lah pyndep beit ha u Nohprah jong u snem 2026.
Shuh shuh u ong ruh ba mar ïa sangeh u slap na ka liang ka NHIDCL ka la ai ka kular ba kin trei stet noh ha kane ka por ba rang. “Ki ruh ki kwah ban pyndep ïa ka kam ha ka por ba la buh kata ïa ka Fourlane ha u Nohprah mynta u snem bad ïa kaba sah pat ha u Nohprah 2026.”