Shillong, Nailar 26 : U Myntri Rangbah ka Jylla ha kane ka sngi Palei u la kyntait ba kam don satia kano kano ka jyrsieh haba ïadei bad ka jingsuba pyndonkam bakla ïa ki 29 tylli ki kali da u Assistant Inspector General of Police (A).
Haba kren bad ki lad pathai khubor, u Myntri Rangbah u la ïathuh ruh ba ïa kitei ki kali baroh la thied katkum ki kyndon kiba la buh.
“Ngam tip naei kane ka kyntien ‘jyrsieh’ ka wan, ka long thik kum ka kyntien kaba thmu ban pyrshang pynkylla ïa baroh. Kam dei satia kumta, hynrei ka hap ban ïaid ryngkat bad ka jingshisha,” u la ong.
U Myntri Rangbah u la kubur ruh ba ki don ki ishu kiba ïadei bad ka jingbhah, hynrei ka don pat ka jingpynslem, kumta u la ong ba katei kam mut ba kan kylla jyrsieh noh. “Kumta, to ngin ap shwa bad ngin sa peit ïa ka kaiphod,” u la ong.
Halor ka jingkylli kaei pat ka sienjam ba ka sorkar kan shim pyrshah ïa utei u heh pulit lada lap ba u donkti ha katei ka jingkynnoh ba pyndonkam bakla ïa ka bor, u Myntri Rangbah u la ong, “Ngin sa tohkit bniah ha baroh ki liang tangba kam dei satia ka jingpyndonkam bakla ïa ka bor…la katta ruh ngin sa peit kumno ka long.”
