Kyntait u CEM ba ka jinghiar shuki u Bah Shemborlang dei ka jingbym skhem ka EC VPP ha KHADC

By Mawphor Editor On Oct 1, 2025

Shillong, Nailur 30: U CEM ba thymmai ka KHADC u Bah Winston Tony Lyngdoh u la kyntait ïa ki jingkam ba ka jingiehnoh kam jong u CEM barim u Bah Shemborlang Rynjah da ka daw jong ka jingsngewkhia ba um don ha ka met kaba koit kaba khiah ba dei ka dak jong ka jingbym skhem jong ka jingsynshar ka VPP hapoh ka Council.
“Nga pynpaw ïa ka jingbym lah ban mynjur bad kane ka jingmut ba ka don ka jingbym skhem ka synshar khaddar hapoh ka KHADC. Ha kawei ka liang, ka don bha ka jingskhem hapoh ka jingïalam jong ka party VPP. Shah ïa nga ba ngan long uba shai: ka jingkylliang nongïalam ha kane ka por kaba mynta ka dei beit na ka daw ka jinghiar shuki noh u Bah Shemborlang Rynjah na ka kam CEM namar ka jingbym don ha ka met kaba Koit kaba Khiah. Kam shym don da kawei pat ka daw halor kane ka bynta. Baroh ar ka EC barim bad ka EC ba thymmai ki long kiba skhem, bad ka party jong ngi ka ïai ban bad pynneh ba kam shym la don kata ka jingbym skhem hapoh ka Council. Ka jingkylla ha ka kam long nongïalam kadei beit kaba shai na ka daw ka jingbym shait bym khlaiñ jong u Bah Rynjah,” ïathuh u Bah Lyngdoh sha ki lad pathai khubor hadien ba u la shimti ïa ka shuki CEM ha ka sngi baar.
Haba ïadei bad ka jinglah ban shimti biang jong u Bah Rynjah ïa ka kam CEM hadien ba u la koit la khiah, u CEM ba thymmai u la ong, “Nga tharai ka dang long kaba dang kloi palat ban pyrkhat halor kane ka bynta. Ngin sa ïasyllok shuh shuh ïa kane ha ki por ban dang wan. Kumba long mynta ka jingpynleit jingmut jong ngi ka dei ban kitbok kitrwiang ïa u ba un ïoh noh kloi ïa ka met kaba koit kaba khiah.”
U Bah Lyngdoh u la pynthikna ba ki rukom treikam jong u kin neh beit ka juh ka jinglam khmat kumba la leh da ka Executive Committee kaba rim. U Bah Lyngdoh u la banjur ba ka kynhun jong u kan khmih bad pynbeit ïa ki kam ba dangsah bad ban pynsted ïa ki jingtreikam jong ki project kiba kongsan.
Katkum ka jingong jong u, ka EC bathymmai kan buh ka thong ban pynïaid shakhmat ïa ki agenda ba la don jong ka party, ban ïakhun ïa kiba bun ki jingeh, bad ban pynthikna ïa ki jingïaid beit ki rukom treikam jong ka council.
U CEM ba thymmai u la pynbna ba ka thup kyrteng jong ki Executive Member (EMs) yn sa phah sha u Lat ka jylla ba pynbud pat da ka jingsam ïa ki jingbhah kam.
U la pynthikna ba baroh ki mat kiba ka Voice of the People Party’s (VPP) ka ïeng kin ïaineh khlem kylla.
Shuh shuh haba pynpaw ïa ki kam kiba hakhmat jong u, u CEM ba thymmai u la ong ba ka donkam ban tei ïa ka kynhun kaba khlaiñ bad ba long kawei. Ban kynjoh ïa kane, ka Executive Committee kan sa shong ïa ki jingïalang ba bun ban shim ïa ka rai lang halor ki kam kiba kongsan shisien ba la lah ban thaw ïa ka kynhun kaba thymmai.
Haba phai na ki jingïoh mad jong u ban khlieh ïa ka tnat Khaïi ha kine ki 6 bnai ba la dep, ha kaba u la pynbeit ïa ki rukom treikam, u la pynpaw ka jingshaniah ba kino kino ki rai ban shim hadien habud yn buh shwa hakhmat na ka bynta ka bha ka miat jong ki paidbah bad jong ka thaiñ, wat hapdeng kiba bun ki jingeh kiba hap mad nangne shakhmat.
Haba ïadei ba ka jingthylli ki jingïadei ka jingïajan hapdeng ka Executive Committee (EC) bad ki dkhot ka Liang Pyrshah, u Bah Lyngdoh u la pynthikna ba ki jingkhang jong ka EC kin plie barabor na ka bynta jong ki. U la kyntait ba ka don kano kano ka jingthylli ka jingïadei bad ki MDC ka Liang Pyrshah bad u la pynpaw ruh ka jinglyngngoh ïa ki jingkdew jong u Nongïalam ka Liang Pyrshah (LO). U Bah Lyngdoh u la banjur ïa ka jingangnud jong u ban pynbeit ïa kino kino ki mat bad pynneh ruh ba ka jingkhang ka plie ïa kino kino ki policy treikam.