Kyntait u Bah Paul ban ïakren bad ki kynhun kiba pyrshah ïa ka tamasa Cherry Blossom

Shillong, Risaw, 19: U Myntri ka tnat Jngohkai Pyrthei Bah Paul Lyngdoh ha ka sngi Palei u la ong ba ka jingpyrshah ïa ka jingpynlong ïa ka tamasa Shillong Cherry Blossom ban sa pynlong shen, ka dei ka jingpyrshang jong ki katto katne ban khanglad ïa ka jingkiew irat jong ki kam jngohkai pyrthei.
“Nga suba ba ka don ka jingpyrshang kaba na lyndet. Ki don ki bor, kiba pyrshang ban khanglad ïa ka jingkiew irat jong ki kam jngohkai pyrthei,” ong u Bah Paul ha ka jingïakren bad ki lad pathai khubor hadien ka jingkyntait ban ïakynduh ïa ka kynhun kaba la thaw ïa ka Joint Action Committee (JAC), kiba pynpaw ka jingpyrshah ban pynkut ïa kane ka tamasa ha ka sngi U Blei.
Ka JAC ka kynthup ïa ki seng na Ri-bhoi District,, kata, ka Meghalaya People United Front (MPUF), Ri-Bhoi Youth Organization (RBYO), United Hynniewtrep Movement (UHM), Saiñdur Tipkur Tipkha Ieng Ehrngiew u Hynñiewtrep (STIEH) bad ka Meghalaya People’s Social Organization (MPSO).
“Mynta ka sngi, u Director jong ka Tourism na Odisha ryngkat bad ki hynñiew tylli ki jylla ka thaiñ Shatei Lammihgi ki don ha Shillong na ka bynta ka jingïalang halor ka Tourism bad ïa kane jingïalang la pyni ruh lyngba ka Indian Express channel sha baroh kawei ka pyrthei, bad ka jingkiew irat ki kam jngohkai pyrthei ha Meghalaya. Namarktaa, kine bor ba khim jingmut ki pyrshang ban khanglad ïa ka jingkiew shaphrang jong ka roi ka par,” u la ong.
“Kumba nga ladep kren, kino kino ki lah ban pyrshah. Hato kam ju long mynno mynno ruh? Ngim pat ju pynlong seh ïa ki tamasa ïaput ïatem ha ka sngi u Blei ha Shillong ha ki snem ba la leit noh?”la buh jingkylli u Bah Paul.
U la ong ba ka Sorkar kam shym la pynbor ïa ki paidbah ban leit sha kane ka tamasa. “Ki paidbah ki don ka hok ban ym leit. Haba phi ong ha ka sngi u Blei, hato ngin hap ban khang noh ïa ki Cinema Hall, ïa ki restaurant, ïa ki park bad ban phah lut ïa ki briew sha Ingmane? Hato ka Sorkar ka lah seh ban leh kumta? Kine ki dei tang ki kam biej,” u la kynthoh.
“Hato phi ong ba u Blei u thaw tang ïa ka sngi u Blei, hato kiwei ki sngi kim dei ki sngi bym khuid? Phi lah ban kyrsum ha ki kam bymman ha kano kano ka sngi bad ban leit pat sha Ingmane ha ka sngi u Blei bad ban pynkhuid ïa ki pop ki sang bad leit biang ha ka Lah Sngi u Blei ban leh pop biang. Hato kaba kumno kane ka rukom pyrkhat? u la ong.
“Mynta lada phi ong balei yn hap ban pynlong tamasa ha ka sngi u Blei, namarkata ngin hap ban pynkut noh ha ka sngi Saitjaiñ bad ki Seventh Day Adventist kin ong balei phi pynlong ha ka sngi Saitjaiñ, ka dei ka sngi khuid jong ngi bad lada phi pynlong ha ka sngi Thohdieng, ki Muslim kin pyrshah, ka dei ka sngi khuid jong ngi, haba kumta kumno pynïaid ïa ka jylla ha kata ka dur,” u la bynrap.
Shuh shuh u Bah Paul u la ong ba ka jingeh hangne ka long ba katto katne ki briew kiba pyrkhat ba ki long kiba kham shemphang ban ïa ki briew kiba la jied da u paidbah.
“Lada ka long kumta balei ki jied ïa ngi? Balei kim shimti hi halade ban pynïaid ïa ka Sorkar? Phi don ïa ka kynhun Myntri, phi do ïa ka sorkar kaba phi la jied da ka iktiar jong ki paidbah. Ha ka por ba phi thep ïa ka vote, phi pyrkhat ba phi kham shempang, phi kham stad, phi kham ïohi jngai ban ïa ki nongïalam ba phi la jied, kata, hi ka dei kaba bakla,” u la bynrap.