Kyntait ki engineer ba pait bad don jingma ka Model Degree College ha Patharkhmah

Nongpoh, Jylliew 20: Tang hadien ka jingkynnoh ba don ka jing orpait halor ka jingtei ïaka Model Degree College kaba don ha Patharkhmah kumba la mih ruh haki lad pathai khubor, u MLA ka Jirang constituency u Bah Sosthenes Sohtun ryngkat ki Engineer ka tnad Education, ba dei peit ïa katei ka building, ryngkat ki nongïalam shnong ka thaiñ Patharkhmah mynta ka sngi kila pynlong ka jingjurip ban pynshisha ïaka jingpait jong katei ka building kaba dang don hapdeng ka jingshna pyndep ïaka, bad kyntait ruh ba katei ka jingorpait kam dei kaba ktah ïaka building baroh kawei hynrei ka dei tang ka jaka ba pynïasoh na kawei ka building sha kawei pat ha ka bynta ba shu plaster namar bala heh ka jaka ba pynïasoh.
Kum ban shu pynpaw ba ïa katei ka Model Degree College la sdang ban tei naduh u snem 2020 lyngba ka Rashtriya Uchchatar Shiksha Abiyan (RUSA) project haka jinglut kumba 11 klur tam, kaba long ruh ka jingkyrkhu kaba khraw ïaki khun samla haka pule ka puthi ba ki bteng ïaki jingpule ba kham shalor, hynrei dang ha kine ki khyndiat sngi kala mih ka jingkynnoh ba katei ka building kala sdang ban orpait kaba lah ban buh jingma hadien habud.
Haba kren sha ki lad pathai khubor naka liang u Bah Sosthenes Sohtun hadien ka jingleit jurip bad ki Engineer u la pynpaw ka jingsngewkhia kaba jur halor ka jingkynnoh kaba la mih ba katei ka building kala or pait khlem da pynshisha da ki bor ba dei peit bad katei ka jingkynnoh kam long kaba shisha hadien ka jingpynshisha bad pynthikna da ki engineer bala lap ba kadei tang haki bynta ba pynïasoh ïa katei ka building.
U la ong ruh ba ka jingwan katei ka Model Degree College ha katei ka thaiñ ka long shisha ka jingkyrkhu ïaki paidbah naduh ki kmie ki kpa bad khamtam ki samla pule ba kim donkam shuh ban leit sha jngai ban bteng ïaki jingpule jong ki bad ka long ruh ka jingsngewnguh kaba khraw ïaka sorkar ba kala lah ban wanrah ïa katei ka college ha Ri-Bhoi District ban kyntiew ïaka pule puthi, hynrei ka long pat kaba sngewsih bala mih ki jingkynnoh ba katei ka building kam long kaba shngaiñ namar ki dak orpait ha kaba kum u MLA u la pynshai ba katei ka dei tang ka jingpynthoh bria bala jan ka elekshon tang ban pynjah burom ïaki nongmihkhmat bad ka sorkar.
Haba pynshai halor ka jingdon ki dak orpait ha katei ka building naka liang u Bah B Tariang Senior Consultant, (Civil Work), RUSA project u la ong ba katei ka building ka dei kaba shngaiñ bad la shna ïaka ha kata ka rukom ban lait na u jumai bala shna bad pynïakhlad ïaki building haki 3 bynta khnang ba lada wan u jumai kam don jingktah ïa baroh kawei ka building.
Halor katei ka dak orpait kaba la mih haki bynta jong katei ka building u la pynshai ba ka dei tang ka jaka ba pynïasoh ïaka building bad kam don jingma eiei namar bala heh ka jaka ba ang (expansion gap) bala shu plaster bad namar ba la heh ka jaka ba pynïasoh katei ka plaster kan or pait beit, watla katta naka liang jong ki kin leh ruh ïakaba donkam ban tah da ki jingtap ban lait ba paw katei ka jaka ba pynïasoh ha shuwa ban plie paidbah ïaka bad kumba long haduh mynta katei ka building ka sah satang u surok ban sa peit da ka tnad PWD, ka bording elektrik ban pynbiang da ka tnad MeECL, ka um bad kiwei kiwei bad khmih lynti ba katei ka college kan ai ka jingkyrkhu ïaki khun samla jong ka thaiñ, u la bynrap.