Kyntait ka sorkar ïa ka jingdawa ka AKMTTA ban khang wan rung ki Tourist Taxi kiba na bar shapoh ka jylla

Shillong, Nohprah 17 : Ka sorkar jylla ka la kyntait mardor ïa ka jingdawa jong ka All Khasi Meghalaya Tourist Taxi Association (AKMTTA) ban khang rung ïa ki Tourist Taxi kiba na bar shapoh ka jylla Meghalaya da kaba pynpaw ba ka long beaiñ ban leh kumta.
Hynrei la shu shim ïa ka rai ba kan khot noh da ka jingïalang ïa baroh ki trai Hotel,, ki trai Resort, ki Tour Operator ba kin shim khia ban kham ailad ïa ki tourist taxi napoh ka jylla ban kit ïa ki nongwan jngohkai kiba leit jngohkai sha kylleng ki jaka jngohkai hapoh ka jylla. ïa kane ka rai la shim ha ka jingïalang ba la pynïaid da u Symbud Mytnri Rangbah ka jylla uba dei ruh u Myntri ka tnad Transport u ma Sniawbhalang Dhar mynta ka janmiet ha ophis treikam jongu.
“ Ka jingïakynduh ka long kaba seisoh bad kaba biang bha namar ngi la ïakren da kaba shai ba ka aiñ kam shah ban khang ia kiwei ki tourist taxi ba kin rung shapoh kajylla hynrei kaei kaba ngin leh ka long ba ngin lum ïa ka jingïalang jong baroh ki trai hotel, resort, ki tour operator bad ngin ïakren ba kin ïaleh ban ïarap ïa ki tourist taxi napoh ka jylla ban kit ïa ki nongwan jngohkai shapoh ka jylla”:.
Na ka liang ka Association ka la kyrpad ba ngin shim ïa ka rai ban khang ïa ki tourist taxi kiba nabar hynrei ka aiñ hi kam shah ban leh kumta ong u ma Sniawbha.
“ Kat kum ka aiñ kam shah ïa ngi ba ngin khang ïa ki kali ba namar ban wan sha ka jylla bad kumta ki dkhot ka association ruh ki la ïa sngewthuh. U Advocate General u la pynshai ba ka aiñ kam shah da lei lei ruh ban khang ïa ki kali kiba na bar ban wan rung shapoh ka jylla jong ngi” ong biang u Symbud Myntri Rangbah.
“ Ngin sa khot ïa ka jingïalang jong ki trai hotel, resort, ki tour operator bad ban ong ïa ki ba kin pyndonkam da ki tourist napoh ka jylla haba kit ïa ki nongwan jngohkai. Nalor kata kan sa don sa kawei ka jingïalang hapdeng ka Association bad ki ophisar na ka tnad transport bad tourism” ong biang u Ma Sniawbha.
U la pynpaw ruh ba la ai jingmut ruh ïaki tourist taxi hapoh ka jylla ba kin long kiba don akor bad pynbiang bha ïa ki kali jongki nadong shadong.
“ Ngi la kyrpad ia ki tourist taxi ban pynbit pynbiang bha ïa ki kali jongki, ban lehkhuid bad ba ki nongniah ki dei ban long kiba don akor don burom khnang ba ki nongwan jngohkai shapoh ka jylla kin sngew tynnad haba shong da ki kali jong ki trai jylla pynkut u ma Sniawbha..