Kyntait ka Sorkar ban kyntiew Deficit, lah ban shu pynkiew tulop ïa ki nonghikai Adhoc

Shillong, ïaïong, 29: Ka Federation of All School Teachers of Meghalaya (FASToM) ha ka sngi Thohdieng ka la aipor tang shitaiew ïa ka Sorkar Meghalaya Democratic Alliance (MDA) ba kan pynurlong noh mardor ïa ki jingdawa kiba ka seng ka ladep ai jingmut bad tyrwa ruh hakhmat ka Sorkar.
Kum ban shu pynkynmaw hangne ba ka FASTOM ka ladep phah ïa ka jingtyrwa sha ka Sorkar Jylla ban dawa kyntiew kyrdan Deficit Pattern lane Deficit System bad ha kajuh ka por ka la tyrwa ba lada ka Sorkar kam lah ban kyntiew kyrdan Deficit ïa ki nonghikai skul Adhoc hynrei ka dei ban pynkiew da ka jingsiew tulop kaba T. 18 hajar naduh ka kyrdan Lower Primary haduh ka kyrdan Higher Secondary ryngkat bad ka jingpynkiew ïa ka jingsiew tulop kaba 5% manla u snem.
Dang ha kine ki khyndiat sngi, u Myntri Rangbah jong ka Jylla u Conrad Sangma u la ong ba ka Sorkar ka dang bishar ïa ka jingdawa jong ka FASToM.
“Kumba la kren da u Myntri jong ka tnat Pule Puthi ka Sorkar Jylla u Bah Lahkmen Rymbui ba ka Sorkar kan ym lah ban kyntiew kyrdan Deficit System/Deficit Pattern, ngi ïoh ïa ka jubab ba ïa mynta ka Sorkar kan pynkiew da ka tulop bad ngi pdiang ïa kata ka rai,” ong u General Secretary ka FASToM u Bah Andrew Lyngkhoi ha ka jingïakren bad ki lad pathai khubor.
Haba kylli, u la ong, “ïa kane ka jingpynshai ngi la ïoh ha ka jingïakynduh ïa u Addl. Chief Secretary uba peit ïa ka tnat Pule Puthi u Bah DP Wahlang ha ka sngi Balang mynta ka taiew.”
“Namarba ngim pat ïoh da ka jingthoh na ka Sorkar, ngi la shu pynjynsur ïa ki jingïakhih tang na ka bynta shitaiew khnang ba ka Sorkar kan dup lah ban shim ïa ka rai hapoh ka shitaiew bad lada ka Sorkar kam lah ban ai da ka jingthoh hapoh shitaiew ngin sa pynbna biang da kawei pat ka jingïakhih kaba kham jur shuh shuh ban ïa kaba la pynlong mynta,” la ong u Bah Lyngkhoi.
U la ong ba ka jingpynjynsur jong ka FASToM ïa ka jingïakhih ka long hadien ba la ïohi ba bun ki khynnah skul kiba shu shong ha ing, ki don kiba shu ïaid sha surok bad don kiba leit sha skul khlem ïoh jinghikai eiei.
“Kum ki nonghikai kiba don ïa ka jingkitkhlieh ngim lah ban shu peit ïa ki khynnah skul ba kin duh noh ïa ka jinghikai kaba ki dei ban ïoh. Dei na kata ka daw ngi la shim ïa kane ka rai (ban pynjynsur tang shitaiew) namarba ngi hap ban peit ruh ïa ka bha ka miat jong ki khynnah skul,” ong une u General Secretary ka FASToM.
“Ka CEC ka la shim ruh ïa ka rai ban kyrpad ïa ki nonghikai ba kin leit phai biang sha ki skul, sha ki Centre ba la bynshet kam da ka MBoSE bad ha kiwei kiwei de ki kamram kiba ka Sorkar ka la bynshet ha ki nonghikai,” u la ong.
“Kumba ka Sorkar ka la pan ïa ka jingïatreilang ngi kloi ban wan sha ka miej jingïakren, ngi long kiba kloi ban pyllait por ïalade bad ban ïasngewthuh jingmut lang ha kino kino ki bynta lada ka Sorkar ka ai ïa ka jingkular sha ngi da ka jingthoh,” u la bynrap.
U Bah Lyngkhoi u la ïathuh hadien ka jingiehnoh jong u Bah Kenneth Shadap ïa ka shuki President, ka CEC jong ka FASToM