Nongstoiñ, Nailar, 11: Kawei ka Kompeni ksam mar pohkhyndew kaba la tip ka Shree Shree Mining Corporation Limited, kaba la sdang ban pyntrei ïa kawei ka projek ksam marpoh khyndew ha Mawlangria, kaba don hajan ka shnong Mawïawtep ha ki thaiñ Rambrai, ka la hap ban sangeh noh namar ba ka Khasi HillsAutonomous District Council ka la kyntait ïa ka jingpan jingbit na ka bynta ban ksam marpoh khyndew ha katei ka jaka.
Ka jingkyntait jong ka KHADC ban ai jingbit ka dei namar ba ka la mih ka jingpyrshah kaba jur na ki paitbah jong ki shnong ki thaw kiba don ha katei ka thaiñ ryngkat bad ki sengbhalang ba la lam khmat da ka FKJGP Rambrai circle.
U bah P.Rngaid sordar shnong barim ka Mawmluh II haba ïakren bad u nongthoh khubor, u la ong ba ka jingksam marpoh khyndew ha Mawlangria ka la sdang ha u bnai Lber jong ne u snem bad naduh ba katei ka jingksam marpoh khyndew ka la sdang ka la don jingpyrshah kaba jur na ki paitbah nongshong shnong.
Kumta ki sordar jong ki shnong ba phre baphre ha katei ka thaiñ kum na Mawliehpoh, Urkhli, Mawmluh II bad kiwei kiwei ki shnong ki la shong pyrkhat halor katei ka bynta kumno kin leh, namar ba ki paitbah ki la dawa ba ki dei ban leh ei ei.
Na ka liang ki rangbah shnong ki la pyntip sha ki nongïalam ka FKJGP ha kaba ki la shimkhia bad ki la leit ban pan jingshai na u Deputy Commissioner ka West Khasi Hills. U la ong ruh ba na ka liang u Deputy Commissioner ruh u la shimkhia bad u la phah da u Majistor ban leit jurip ïa katei ka jaka.
U bah Rngaid u la pynkynmaw ruh ba wat hadien ba u Majistor u la wan jurip bad u la bthah ïa ki nongpyntrei ba kin sangeh noh ruh, kim shym la patiaw bad dei tad haduh ba ki rangbah shnong ki la hap ban leit ïakynduh ïa u Chief Executive Member ka Khasi Hills Autonomous District Council, ha kaba ki la ai da ka jingthoh ba kin ym shah da lei lei ban ksam marpoh khyndew.
Ki la ong ba ki tyllong umbam umdih ki don sawdong jong katei ka jaka bad ka la ktah haduh katta katta ïa ka jingkoit jingkhiah jong ki paitbah namar kaba pyndonkam ïa ka. Kumta ka KHADC ka la sngap bad ka la kyntait shisyndon ban ai jingbit na kabynta ban ksam mar pohkhyndew na katei ka jaka. U la ong ruh ba naduh ba la shah kyntait ïa ka jingpan jingbit na ka KHADC ka Kompeni ka la pynsangeh noh shisyndon ïa ka jingksam marpoh khyndew ha katei ka jaka.
