Shillong, Nailur 21: Ka Khasi Hills Autonomous District Council(KHADC) ha ka sngi Balang da kawei ka sur ryngkat ki khlieh nongsynshar kiba don ïa ki Kashari ha ka jylli synshar jong ki ki la rai ban kyntait ban pdiang ïa ka rai ka sorkar ban pyntreikam ïa ki kyndon CrPC bad CPC ha baroh kawei ka jylla lymda ka pynmih biang ïa ka jingpynbna ban kham pynshai (Corrigrndum) ïa ka jingtreikam kine ki kyndon ha ki kashari ba don ha ka jylla.
Kane ka rai jong ka KHADC ryngkat ki khlieh Nongsynshar ka dei hadien ba na ka liang ka KHADC ka la pynsngew ïa ka jingtreikam jong kine ki kyndon CrPC bad CPC kaba lah ban ïatyngkhuh bad ka Para 4 bad 5 jong ka Khyrnit ba Hynriew ka Riti Synshar ka Ri kaba kine ki kashari ki ïoh bor ban bishar mokotduma.
Haba kren ha kane ka sngi U Bah Titos Chyne CEM ka KHADC u la ïathuh ba na ka liang ka KHADC kan sa phah biang ka jingthoh sha ka sorkar jylla ban phah ban pynbna khamshai ïa ka hukum ba ai bor ïa ka ingtreikam ki kyndon CrPC bad CPC namar ka lah ban ïatyngkhuh bad ki jingtreikam ki Ïingbishar District Council.
“Lada phi peit ha ka hukum ba la pynmih la ong beit ba ki kyndon ka CrPc bad CPC ki treikam ha baoh ki kashari ba don ha ka jylla bad ka ong ruh ba ki Kashari District Council kin bteng ban treikam kumba ki ju leh” u la ong
U la ong ba na ka liang jong ka KHADC ka jingbym pdiang ïa kane ka hukum ka sorkar namar kan sa mih ka jyrwit jyrwat hadien habud. “Lada ka sorkar ha ka hukum ka ong shai ba kino kino ki mokotduma kiba dei hapdeng riewlum para riewlum yn shim bishar beit da ki kashari District Council na ka liang jong ngi ngin ym don jingthut eiei hynrei balei ngim lah ban pdiang namar lyngba kane ka hukum ki Kashari sorkar ne Normal Court ruh lyngba kane ka hukum kin lah beit ban bishar ïa ki mokotduma ki riewlum”.
U Bah Titos u la ong ruh lada pyntreikam ïa kane ka hukum kiba bun ki mokotduma ba dei ban bishar ki Kashari District Council na ka liang ki kashari sorkar ruh kin don bor ban shim rai bishar kaba lah ban wanlam wat sha u pud ban hap kang khyrdep noh ïa ki Kashari District Council.
U la ong ruh ba lada ka sorkar kam shym sngap ïa kane ka jingai jingmut ka KHADC kan sa shu pynjrong ïa ki mokotduma namar ha kaba kut lada ki rai ba bishar ki District and Sessions Court halor ki mokotduma riewlum para riewlum ki arliang mamla kim hun bad lada bteng ban ujor sha ki kashari ba kham heh kum sha High Court bad Supreme Court kin sa pynphai biang sha ka Ïing Bishar District Council namar dei tang ma ka ba don ka iktiar ban bishar ïa kine ki mokotduma la ong da kaba ai nuksa na kawei ka mokotduma ha Nongpoh kaba ka District and Sessions Court ka la rai pynrem hynrei hadien ba na ka shiliang mamla ki la ujor sha High Court ba ka la pyndam ïa kane ka rai da kaba ong ba dei ka Ïing Bishar District Council ba don bor ban bishar ïa kata ka mokotduma.
U la ïathuh ba na ka liang ka KHADC kan sa phah shen ïa ka jingthoh sha ka sorkar halor kane ka mat.
Haba jubab halor ki rai ba ka KHADC kan shim lada ka sorkar kam sngap, u Bah Titos u la ong, “na ka liang ki Khlieh Nongsynshar hi ki la rai ban ai beit ki jingkyrshan ïa kino kino ki sienjam kiba ka KHADC kan shim wat ban pynlong da ki jingïakhih pyrshah ïa ka sorkar ha la ki Hima ne jylli synshar lada ka sngap mynti ka sorkar”.
