Kyntait ka JHADC ïa ka Application Form rejistar jaka na ki paidbah ka Huroi bad Hingaria

Khliehriat, Risaw, 11: Ar ngut ki nongshong shnong na Huroi bad na Hingaria, East Jaiñtia Hills District, kata, u Bah Thepmon Khonglah bad u Bah Ephesos Talang ha ka 8 tarik mynta u bnai ki la phah da ka jingthoh sha u Chief Executive Member (CEM) ka Jaiñtia Hills Autonomous Distict Council (JHADCC) Bah Thombor Shiwat ban pan jingpynshai halor ka jingkyntait ban pdiang ïa ki Application Form ba la thmu ban registrer ïa ki jaka puta kiba don ha shnong Huroi bad Hingaria.
Ki ar ngut ki nongshong shnong kiba la pynpaw ïa ka jingsngew khia ki la ong, “kane ka jingleh jong ka Jaiñtia Hills Autonomous Distict Council ka la buh ïa ngi ha ka umdum bad ka pynlyngngoh ba na kaei kadaw ba um treh ïa ki aplication form bad kane ka jingleh ka ktik ïa ka jingmut jingpyrkhat jong ngi bad ka buh ruh ïa ki jingkylli ha kiba bun kiba ngi kwah ba phin pynshai na ka ophis jong phi kum u CEM.”
“Ha ki por kiba la leit noh, ki don ki nongshong shnong jong ka shong Hingaria bad ka shnong Huroi kiba la ïoh ban rejistar ïa ki jaka jong ki bad ki la ïoh ruh ïa ki Land Holding Certificate (LHC) na ka JHADC ban pynshisha ïa ka jinglong trai jong ki ïa ki jaka ba ki la dep rejistar, hynrei mynta pat la kyntait ïa ki aplikeshon jong ngi bad la aidaw ba ngi dei ban leit sha ka Elaka Rymbai wat haba ki la tip ba ym pat don u Dolloi uba pura ha Elaka Rymbai,” ki la ong.
Haba buh jingkylli halor kane ka jingshah kyntait, ki arngut ki rangbah ki la ong, “kaei ka daw ba nalor ba ka ophis ba donburom u CEM ka tip shai ba ym pat don u Dolloi ba pura ha ka elaka Rymbai bad ïa ka kam jong u Dolloi la shu aiti shipor ha u Administrative Officer jong ka District Council hynrei balei pat kim treh ban rejistar ïa ki jaka.”
“Ka daw kaba ktik palat ïa ka jingmut jingpyrkhat jong ngi ka long ba ngi kwah ruh ban kylli na phi ka Jaiñtia Hills Autonomous District Council ba mano ba don ka bor ban peit ïa ka Elaka Rymbai mynta ha kum kane ka por namarba ym pat don u Dolloi ba pura ha ka Elaka bad kumno phi shu phah ïa ki paidbah ban leit sha Elaka namar katkum ka jingtip jong ngi ïa kane ka kam ka Elaka hi kam don bor shuh katba ym pat ïoh da u Dolloi uba pura. Balei ngi ong kumta namar ka Elaka kam lah ban ai ai jingmynjur ïa ki kot ki sla bad dei tang u Dolloi uba lah ban ai ka jingmynjur ïa ki kot ki sla bad kumno ki briew jong ka District Council bad balei ba ki phah ïa ki paidbah sha ka lynti ka bym dei,” la buh jingkylli ki arngut ki rangbah.
“Ngi sngewphylla halor kane ka jingleh u CEM bad ka ophis jong u ba ki nud ban phah ïa ngi namarba ngi tip ruh ba dei ka District Council kaba peit bad khmih ïa ki kam jaka puta bad ïa ki nongshong shnong jong ka Elaka ha kito ki Elaka ki bym pat don u Dolloi ba pura bad halor kane ruh ngi kwah jingpynshai khnang ba ka kam kan ïaid beit ïaid ryntih bad kan wanrah ruh ïa ka roi ka par ha ki shnong ki thaw,” ki la bynra.
“Ngi kyrpad rit ïa u CEM bad ïa ki dkhot jong ka Executive Member bad ka EM Incharge jong ka Elaka Rymbai ban shimkhia ïa kane ka kam kum ki paradoh parasnam bad ban pdiang ïa ki aplication form ban rejistar ïa ki jaka puta khnang bad dup ïoh ïa ki Land Holding Certificate,” la kyrpad ki arngut ki rangbah.