Kyntait ka ïingbishar ïa ka jingpan jamin ki 7 ngut kiba suba donkti pyniap ïa u (L) Milas
Khliehriat, K’Lyngkot 09: Ha kaba ïadei bad ka jingkhlad noh u Bah Milas Khaïi uba na shnong Wahsarang East Jaiñtia Hills District uba la shah bom shah shoh ha ka kynhun jong ki phra ngut ki briew ha shnong Wahsarang myn ha ka 25 tarik u Nohprah, ka ïingbishar District Session Court Khliehriat East Jaiñtia Hills District ka la kyntait ban ai jamin ïa ki hynñiew ngut ki briew kiba la pan ïa ka anticipatory bail bad bthah ïa u investigating officer uba tohkit ban set ïa ki ha patok lane police custody bad mynta ki hynñiew ngut ki la don ka patok hapoh ka jingtohkit ki pulit.
Ka kynhun jong ki phra ngut ki briew kiba la suba donkti ha kaba bom ba shoh ïa u (L) Milas Khaïi ki dei kiba la tip kyrteng kum u Bhalang Lamo uba dei u Waheh Shnong Wahsarang, u Bah Khmih Bareh, uba dei u Assiatant Waheh Shnong, u Pius Khaïi, u Tali Lamo, Sbunlang Lamo, Sarat Lamo, u Ngaidlang Lamo bad u Prescious stone Lamo bad ïa kane ka kynhun la lamkhmat da u Waheh Shnong Wahsarang ha kaba myn ha ka miet jong ka 25 tarik u bnai Nohprah 2025 ha ka por kumba 9.30 mynmiet, kane ka kynhun ka la leit sha ka ïing sah jong u (L) Milas Khaïi ha shnong Wahsarang bad ki la pyrshang ban wad ïa uwei u briew uba kyrteng u Jur Tlang namar ba u la khot ïa u Waheh Shnong bad byrngem ïa u kumta ka kynhun ka la suba ba u Jur Tlang u don ha katei ka ïing jong u Milas Khaii lem bad uwei pat u Kamelus Khaii, la ong ba ka la don ka jingïasngewthuh bakla hapdeng kitei ki kynhun kiba na baroh ar liang ha kaba ki la don ruh ki briew kiba na ka kynhun ba lam khmat da u Waheh Shnong, u Bah Pius Khaii bad u Tali Lamo ki la shoh la dat da u dieng ïa u bah Kamelus Khaïi bad ïa u (L) Milas Khaïi bad ha kane ka jingjia ka la mih ka jingïa mynsaw bad la rah ïa kiba mynsaw sha hospital da kiba ha ïing bad hadien kane la pyllait noh ïa ki na hospital bad u (L) Milas Khaii pat u la khlad noh ha ka 1 tarik u kyllalyngkot 2026.
Napdeng kitei ki phra ngut kiba la suba donkti, u Bah Precious Stone Lamo u dei uba dang phet rieh haduh mynta na kti ki pulit bad u dei ruh uba khlem pan ïa ka jamin (Interim bail) na ïingbishar District Session Court Khliehriat East Jaiñtia Hills District katba ki hynñiew ngut kiwei pat mynta ka don ka kti ki pulit.