Kyntait ka HYC ïa ka jingtyrwa ka sorkar ban pynrung ïa ki kyndon ILP ha ka Immigration Act

Shillong, K’Lyngkot 2: Ka Hynniewtrep Youth Council (HYC) kala kyntait ïa ka jingtyrwa ka Sorkar Jylla ban pynrung ïa ki kyndon ba syriem kum ka ILP ha ka Immigration and Foreigners Act, 2025 haba khein ïa ka kum ka buit politics tang ban pyntlot bad pynsuki ia ka jingdawa pyntreikam ïa ka ILP ba Meghalaya.
Ha ka kyrwoh ba pynmih ha ka sngi Balang, u President ka HYC Bah Roykupar Synrem ula ong ba ki paidbah ka Jylla Meghalaya kin ym hun satia da kaba pyndonkam ïa ki kyntien ki bym thikna bad kaba lah ban pynman kat kaba kwah ha ka lynti ka ain.
“Ki kyndon ba syriem ïa ka ILP kam dei ka ILP” ula ong haba bynrap “Lada ka Sorkar Jylla ka thmu hok shisha ban ïada ïa ka bha ka miat ki trai muluk, kan jin da lah ïoh ïa ka ILP ha ka jaka ban ïai tyrwa ïa kiwei pat ki sienjam ki bym long shai kat kum ka ain, ka bym don ïa ki kyndon bala pynkhreh (draft provision) bad ka ba khlem buh por”.
Ka HYC kala kynthoh ïa kane halor ka jingkren ba dang shen jong u Symbud Myntri Rangbah ba khmih ia ka kam Pohiing (Police) Bah Prestone Tynsong halor kane ka kam, haba ban jur ba kano kano ka ain ka bym don ïa ka bor ba pura ban pyrrkhing ïa ka jingrung, ki nongshongshnong, ka ioh kam ïohjam, ka khaïi ka pateng, ka jingbuhai shnong ki bym dei ki riewlum ka dei ka jingshet kylla ïa ka jingshngain ki trai ri trai muluk.
Kala maham ba kano kano ka jingpynrung ïa ka kyndon kaba tlot ha ka Central Act, kan ym lah satia ban tehlakam ïa ka jingrung beain ki mynder ri ne ïada na ki jingthombor ha ka jingbun paid.
“Ngi kren shai ba kano kano ka ain ka bym ai ka bor ba pura ïa ka Meghalaya ban pyrrkhing ïa ka jingrung, ban sah, ban trei ban ktah, khaïi, bad buhai shnong ki briew bym dei ki riewlum ka dei ka jingshet kylla ïa ka jingsngain ki trai ri trai muluk” ong u Bah Synrem.
Ka HYC kala dawa ïa ka jubab na ka Sorkar Jylla da kaba ong “Hato ka Meghalaya kan ïoh ïa ka ILP ba pura kaba don ïa kajuh ka bor kat kum Bengal Eastern Frontier Regulation, 1873, ne em? Kano kano kaba duna hi ïa kane ka dei ka jingthok”.