Kyntait ka Dorbar Shnong Laban ban ïarap ïa ka longkmie ba shah thad ha ki Social Media

Shillong, Nailur 20 : Ka long kaei kaei kaba ym sngewlah ban pdiang ba ka Dorbar Shnong kaba dei ban peit ïa ka khia ka shon bad ïada ïa ki nongshong shnong na kino kino ki jingïakynduh jongki, hynrei ka Dorbar Shnong Laban ha ka jaka ban ïada ka thok bad shukor pynban ïa ki bor sorkar namar u Secretary Shnong u la thok bad shukor pylleiñ pylleiñ ïa u ADC.
Kane ka la jia haba kawei ka Booth Level Officer (BLO) jongka 19 South Shillong Assembly Constituency ka la shah kynnoh riew thok bad shah pynbudnam da kaba thad syndon ha ki Social Media ha ki arngut ki shitnga hynrei haba ka pyrshang ban wad jingïarap na ki bor jong ka Dorbar Shnong Laban ki kyntait ban ai jingïarap ïa ka.
Haba ïa kren bad i kong Banrikynti i la ong “ Tad haduh mynta ka miet ruh ym don satia ki bor synshar shnong kiba la phone ne kylli tohkit shaphang kane ka jingjia ïa nga wat hadien ba la dep pyntip sha ki bor synshar shnong naduh hynnin ka sngi ruh”.
Ka kong Banrikynti Ryntathiang kaba la ngat ha kane ka apot ka la pyrshang naduh mynhynnin ka sngi bad miet ban ïoh ïakynduh bad ïakren bad u Rangbah Shnong u bah Edward Kharwanlang bad ïa u Secretary Shnong u Joy Rynjah halor kane ka jingjia ïa ka hynrei kaba lyngngoh ka long ba wat hapdeng ka jingpyrshang ka khlem ïoh lad satia. La synran lang ïa ka kong Banrikynti da kiba haïing hasem, ki paralok nongshong shnong namar ki la sngew synei ïa kane ka jingshah thad ba khlem nongrim jongka hynrei ka hap ban ap haduh mynne mynstep tangba la katta ruh ka khlem ïoh ïa kynduh hi ïa u Rangbah Shnong.
Ka kong Banri ryngkat ki paralok bad kiba haïing ki la pyrshang ban ïoh ïakren bad u Rangbah Shnong da kaba phone bun bun sien hynrei um jubab satia ïa ka phone bad kumta ki la pyshang ïa u Secretary bad une ruh haba u la shim ïa ka phone u la kren kyllaiñ da kaba kren tohmet bad kyntait ban wan sha ophis ka Dorbar Shnong.
Kane ka jingleh jong ki nongïalam shnong ka la pynkhie bitar ïa kine ki longkmie kiba ïa ap shitom hakhmat ophis ka Dorbar Shnong namar ki la ïa ap naduh ka por mynstep haduh ka por shiteng synñia da kaba shu ïa shong kat haba lap ba shem wat halor ki byrni khaw ka dukan u Marwari nalor ka jingdum tliw tliw ba ym shym treikam ka street light. Dei tad haduh ka por shiteng synñia ba la wan kiba haïing, ki para nongshong shnong, ki samla bad rangbah kiba la kyrpad ïa kine ki longkmie ban ïapra noh ba ki sa kohnguh bad leit phai noh sha la ïing da kaba mynsiem kaba sngewsih ryngkat ki ummat kthang.
Kaba sngewthamula shuh shuh ka long ba kiba bun ki ïaid lynti na katei ka jaka bad ïohi ïa kine ki longkmie hynrei ym don ba kylli bad pyrthew lait noh tang u Assistant Rangbah Shnong u bah Hubert Marbaniang uba la wan ban kyrpad ïa ki ban ïa pra noh lait tang ma u ym don uwei ruh na ki nongkit kam shnong kiba wan ban ïa syllok bad ïakren bad kine ki longkmie.
Ha ka jingshisha hynnin ka Lah Sngi U Blei ka kong Banrikynti ka la leit ujor da ka ejahar sha u SP (City) halor kane ka jingshah thad jongka ha social media. La synran lang ïa ka da ki paralok bad ki la leit ai kopi ruh sha ka DC bad SP ka East Khasi Hills bad kumjuh ruh sha ka ophis u Chief Electoral Officer (CEO) khnang ban ïoh ïa ka jingbishar ba hok.
Hadien kane kine ki longkmie ki la ïa kynduh ruh ïa ki lad pahai khubor ha Shillong Press Club ban pynshai sha ki paidbah halor kane ka jingshah thad ba khlem nongrim jongka kong Banrikynti ha ki arngut shitnga ha ki social media. Ka jingthmu ka long ruh ban pyntip wad sha ki para BLO kiba hap ban rung man la ki thliew iing ban lum jingtip na ka bynta ka Election Commission of India ba kin nang ban husiar nangne sha khmat ïoh ngat ha kum kine ki riew khlemraiñ kiba la pynkheiñ aiñ bad thad khlem nongrim ïa ka BLO ha ka social media. Nalor kata u kurim jong katei ka briew lei lei u nud ban kam ba u trei hapoh SP ophis hynrei haba la tohkit na u SP (City) u la ïathuh ba u shu thok shu shukor namar u khlem trei ha katei ka ophis.
Dei ruh hadien kane ba ki longkmie ki la leit sha ophis dorbar shnong ban pan jingpynshai na u Rangbah Shnong bad Secretary Shnong kaei kaba ki la leh na ka liang jongki halor kane ka kam. Nalor kata ka jingthmu ka long ruh ban pan jingpynshai na u Secretary ka Shnong kumno u nud ban thok ïa u Additional Deputy Commissioner (ADC) u bah Ronny Wahlang da kaba ong ba ka shnong kam tip ei ei halor kane ka kam ba la phah da ka Election Commission of India. Kane ka jingthok jongu ka la lam sha ka jingjan ngat shah pynshitom sa uwei u BLO uba la dep ai ïa ka shithi na ka ophis u DC sha u Rangbah Shnong ha ka jingïadon ryngkat u Secretary Shnong, u Lumlang bad kiwei kiwei de.
Kat haduh ba thoh ïa kane ka khubor, ka kong Banrikynti ka don hapdeng ka jingjaw ummat kthang namar ka dorbar shnong kam suidñiew ban wan shakhmat ban ïarap ia ka bad ban bishar hok halor kane ka jingshah thad madan ba khlem nongrim jongka. Kane ka long thik kumba ki leh bym kheiñ snep bad ibeiñ ïa kane ka longkmie bad kam ïapher na ka jingïuhroit ïa ka hok longbriew man briew ki paradoh para snam.