Shillong, Naitung 16 : Ka MP barim ka Tura ka Agatha K Sangma ha ka sngi Balang ka la kyntait ïa ka jingphriang ki khubor ba ka lah ban ïakhun ïa ka elekshon MP Rajya Sabha kaban long ha u snem ban wan.
Haba kren bad ki lad pathai khubor, ka Agathai ka la ong ruh ba haduh mynta hi kam pat don kano kano ka jingïakren hapoh ka National People’s Party (NPP) ha kaba ia dei bad katei ka kam.
Nangta ka ong ruh ba lada ka long kumno kumno ruh kan kyrshan beit ïa kaei kaba ka party ka shim rai.
“Kumba ka long mynta, ngim pat don kano kano ka jingïakren haba ïadei bad ka kam MP Rajya Sabha. Kine ki dei tang ki khubor hamsaïa,” ka la ong.
Shuh shuh ka ong ba kam pat kwah satia ban ong ei ei halor kane ka bynta hynrei ka ong pat ba tang kawei ka kam kaba shai ka long ba uno uno ne kano kano ka krytong ba party ka tyrwa kan kyrsshan beit ïa kita.
Haba jubab pat halor ka jingkylli, kumno kan leh pat lada jia ba ka party ka tyrwa ïa ka kum ka kyrtong, ka la ong, “Kadei ka rai jong ka party bad kata hi ka long kaba shai ba ngan kyrshan ïa kata.”
