Shillong, Lber, 22: U President jong ka Khasi Disabilities Association (KDA) u Bah Starwin Kharjana ha ka sngi baar u la kynnoh ba don uwei u MLA na East Khasi Hills District, uba ka Seng kam kwah ban pynpaw kyrteng, uba la kren poh ïa ki dkhot jong ka seng ha ka por ba ki leit ban ïakynduh ïa u na ka bynta ki jingdonkam.
“Ngi lap ba don ki MLA ha kane ka jylla Meghalaya ki ong ïa kiba leit pan jingïarap jong ki bym ïohi ha ki khmat, ka jubab jong ki ka la ong, da kat ïa uba peit ngam lah ban ïarap kumno ngan ïarap ïa phi u bym ïohi,” la kynnoh u Bah Kharjana haba ïakren bad ki lad pathai khubor.
“Nga shu ong tang kane kawei, lada phi mut ban ïarap shu ïarap beit bad lada phim don jingmut ban ïarap kren da kaba jaijai bad ngi ruh ngin ym wan pan jingïarap shuh hi ruh,” ula ong.
U la pynshai ba ki dkhot ka seng kiba leit pan jingïarap na utei u MLA ka long ban ïoh ïa ka Income Certificate na ka bynta ban aplai ïa ka Unemployment Allowance. “Lada ngi leit kum ma ngi (kiba duna dkhotmet) ki la don lypa da kawei ka jingmut. Lada ki don da kawei pat ka jingmut ka pynartatien ïa ngi wat ban phaikhmat sha kine ki MLA kiba ngi la jied ban thaw aiñ na ka bynta jong ngi ha Assembly,” u la bynrap.
“Ha kine ki bnai shwa ka elekshon 2023, ngin lum lut ïa ki briew kiba duna dkhotmet ha nongbah Shillong ban ïakren halor ki jingeh ba phi ïakynduh bad ki MLA ba ngi la jied na ka bynta san snem khnang ba ngin ïoh pynpaw paidbah lyngba ki lad pathai khubor,” la ong shuh shuh u Bah Kharjana.
Haba kylli mano uta ne kata ka MLA kaba kren poh ïa kiba duna dkhotmet, u Bah Kharjana u la kyntait ban ïathuh kyrteng da kaba ong, “kam bha ban ïathuh kyrteng.”
“Ki don ki dkhot ka seng kiba wan ïathuh ha nga bad katkum jingïohsngew ki don uwei arngut hi. Kum kine kiei kiei ngim kwah ba kin jia. Lada ki kren kumta ka long kumba ki kren ibeiñ ïa ngi,” u la bynrap shuh shuh.
“Ngim donkam ïa ka pisa ka tyngka, hynrei ngi donkam tang ïa ki jingthoh ba phin ïarap lem ïa ngi bad ki ktien kyntu kynpham ïa ngi kum u kpa jong ka Constitency kata hi ka la biang ïa ngi,” u la ong.
Katkum ka jingïathuh jong une u nongïalam ka KDA, ki briew kiba duna dkhotmet ha ka jylla baroh kawei ki don haduh 44 hajar ngut. “Lada kumno kumno kiba la don ïa ka EPIC ki long mar shiteng. Lada dei ha ki Constituency kiba rit, kiba duna dkhotmet ki la lah wat ban pynjop ïa uno uno u kyrtong. Na kata kata ngi ruh ngi don la jong ka hok ban rai rem ne rai jop ïa uno uno u kyrtong uba ieng Elekshon,” la ïathuh u Bah Kharjana.
