Shillong, Risaw, 24: U hehduh jong ka RSS u Mohan Bhagwat u la kynnoh ba dei ki bor kiba nabar kiba donkti ban wanrah ïa ka jingïakynad ha ka jylla Manipur .
“Ki Meiteis and Kukis ki im ki shong ki sah lang ryngkat ki snem. Ka dei ka jylla khappud. Mano ba ïohnong na kane ka jingïakynad? Ki bor kiba nabar kiba ïohnong. Hato ym dei ki briew kiba nabar kiba donkti ïa kaei kaba la jia hangtei,” la buh jingkylli u Bhagwat.
Une u heh ka RSS u la ong, “u Myntri ka tnat Kam Pohing u Amit Shah u la leit jngoh ïa ka Jylla Manipur lai sngi kynthih. Mano ba donkti ban ai ding ïa ka jingïakynad? Kam shym la jia, bad ym shym la thmu khnang ba kan jia.”
“Hato ym dei ki bor kiba nabar ki shim kabu ïa ka jingïakynad bad ka jingbym skhem ka synshar ka khadar ha Manipur. Hato ka sainpyrthei ha ka south east Asia also ka don bynta ha kine ki jingjia,” ong u Bhagwat haba kren ha ka jingïaid rally ka RSS ha Nagpur.
“Haba ka don ka jingpyrshang ban wanrah ïa ka shongsuk shongsaiñ, ki mih pynban ki jingjia. Ka pynïajngai ïa ka jingïajan hapdeng ki jaidbynriew. Mano kiba donkti ban leh kum ïa kine ki kam? Mano ba donkti ban kynshoit ïa ka jingïaumsnam? u la buh jingkylli.
U heh ka RSS u la ong ba u sngew sarong ba ki nongtrei jong ka Sangh ki la pyrshang ban wanrah biang ïa ka shongsuk shongsaiñ ha Manipur.
