Shillong, Rymphang 21: U Chief Executive Member (CEM) bad u kyrtong ka NPP na Nongthymmai constituency u Bah Pynïaid Sing Syiem ha ka sngi Thohdieng ula kynnoh ba u President ka Voice of the People Party (VPP) u Ardent M Basaïawmoit ula ïalam bakla ïa u halor ka Article 371 kaba dei ka subjek kaba la khluid bha ha kine ki sngi ïalap elekshon.
“Lada ki briew na kiwei ki Jylla, ki bym don Sixth Schedule , ki ïakhun mynta bad shah jingit ban ïoh ïa ka, kumno kan lah long ba ka Jylla kum jong ngi kaba la ïoh ïa ka jingïada na ka Sixth Schedule kam sngewthuh ïa ka bor jong ka,” ong u CEM hadien ba dep thep vote ha ka sngi Thohdieng.
U la bynrap ruh da kaba ong, “Ha ki snem ba la leit, ngi la shah ïalam bakla ha u President ka VPP ha kaba ula kam ba ka jingdawa ïa ka Article 371 kan ym lam sha ka jingpynduh noh ïa ka Sixth Schedule. Hynrei hadien ba la pule bha ïa baroh ar, ngi shem ba ka Sixth Schedule ka khlam khlaiñ ban ïa ka Article 371 namar ka ai ka jingïada bad tyngkai ïa ka riti ka dustur ba riewspah jong ngi.”
Haba pynpaw ïa ka jingsngewskhem ban jop ïa ka elekshon, u CEM ula ong ba ka jingïaid lynti jong u ban shakri ïa ki paidbah ka Nongthymmai ka la sdang.
“Ngi sngewskhem ba ki paidbah kin vote ïa ka party haba pynshong nongrim ïa ki jingpyrshang jong ngi ban nang pynkhlaiñ ïa ka sixth schedule bad ban leh eiei halor ki mat kiba kongsan. Nalor kane, ngi la lah ban mynjur ïa bun ki bill ba kongsan ban ïada ïa ka Jaidbynriew bad ngi pynthikna ruh ïa ka roi ka san jong ki constituency,” ula bynrap.
Ula ban jur ïa ka jingdonkam ban leh eiei halor ka jingkyrduh um ba la mad da ki paidbah ka constituency nalor ka jingwad ïa ki lad ki lynti ban weng ïa ka jingeh ha ka jingbym ïohkam ïohjam da kaba buh ïa ki coaching centre, ka vocational training, skill development bad ruh ban buh ïa ka rehabilitation centre jong ki nongdih drok.
Haba ban jur ïa ka jingdonkam ban kyntiew ïa ki kam ïalehkai hapdeng ki kam, u Bah Pynïaid ula ong, “Ngan sa tyrwa ban shna ïa artylli ki madan hapoh ka Nongthymmai constituency ka ban ai jingmyntoi ïa ki khynnah bad ki samla ba don sap.”
Ula ban jur ruh ïa ka jingdonkam ban pynjanai ïa ki jaka ai jingsumar hapoh ka constituency.
