Mairang, Ïaïong 27: Ka jingleh donbor jong u bah Grostinglin Ryntathiang u ba dei u Secretary jong ka Village Employment Committee jong ka shnong Sarong kaba hap hapoh ka Mairang C&RD Block, ka la pynlong ïa ki riew rangbah bad ki longkmie jong katei ka shnong ban thad madan ïa ki jingleh jong u bad ban kyrpad ïa ki bor ba halor ba kin ïarap lem ban pynbeit ïa ki kynrum kynram hapoh shnong kiba la mih namar ka jingleh jong utei u rangbah.
Ki riew rangbah jong katei ka shnong ba kynthup ïa u bah Risen Lyngdoh Secretary Shnong, bah Khaiñborlang Jana, bah Overwell Rani ryngkat bad ki longkmie ki la pyntip ha u nongthoh khubor halor katei ka jingleh donbor jong utei u rangbah, ha kaba la leit ban ïakynduh bad la ïoh ruh ban ïakren markhmat bad ki mynta ka sngi ha katei ka shnong, ha kaba ki la pyni ruh ïa ki jingpynshisha lyngba ki kot ki sla bad ki dak ki shin kiba paw na ka jingleh donbor jong u.
Kitei ki jingshisha ba ki la pyni da ki kot ki sla ba ki la ïoh copy na ka Block Ophis kaba don ha Mairang hi, ha kaba ïadei bad ka jingpyntrei bylla ïa ki khynnah kiba dang hapoh khatphra snem ka karta. Nangta ka jingpynrung kyrteng ha ki Job cards ïa ki briew ki bym dei napoh shnong, ka jingpynrung kyrteng kum ki nong bam khaw reshon ïa ki bym dei napoh shnong, ka jingpynkylla jaka shna maw block ïa ka ïing ba la shna na ka bynta ban bret ñiut da kaba pynïasoh lang bad ka ïing briew bad kiwei kiwei.
U bah Overwell Rani haba pynshai halor katei ka jingshah leh donbor jong ki paitbah, u la ong ba ka long kaei kaei kaba pynlyngngoh namar ba utei u briew um don shuh hapoh shnong la slem bha, namar ba u la leit shongkha ha ka shnong Umthied (Bynther). Hynrei na ka daw ba la thung ïa u kum u secretary jong ka VEC ha ka por ba u dang don ha shnong, u bat sah haduh mynta bad um ailad satia ba kiwei pat ki nongshong shnong kin ïoh bynta lem.
Nalor kata u la ong ba kaba kham pynsngewsih ïa ki paitbah, ka dei namar ba ïa baroh ki kam pynroi kiba ka sorkar ka la mang na ka bynta ki paitbah kum ka jingpyntrei ïa ka skhim shispah sngi, um ju pynïoh bynta sha kiwei pat ki kyntoit shnong. Hynrei u jied beit tang ha ka jaka ba shong ba sah da ki briew jong u. Nalor kata u la pyni ruh ïa kawei ka ïing ba ka sorkar ka la mang pisa na ka SLRM ban lum lang ïa ki jaboh jabaiñ, hynrei utei u briew u la pynlong pynban kum ka karkhana shna maw block bad ka kamra ban buh ïa ki tiar ki tar da kaba shna pynïasoh lang ruh bad ka ïing briew.
U bah Rani u la ïathuh ruh ba kat kum ka jingtip jong u ka pisa ba la mang na ka bynta katei ka ïng ban lum thup ïa ki jaboh jabaiñ ka long haduh Hynñiew lak tyngka, hynrei haba peit pat ïa katei ka ïing imat ba wat tang shi lak tyngka ruh kam lut ban shna. Nalor kata u la ong ruh ba kaba pynlyngngoh shuh shuh ka long ba man la u snem, um ju lum ïa ka dorbar ban ïa pyrkhat ïa ki kam na ka bynta ka jingmyntoi jong ki paitbah, hynrei ïa baroh ki kam u leh tang marwei bad teng teng haba ki para rangbah napoh shnong ki ai jingmut bad pyni lem um ju sngap hynrei u leh don bor beit marwei.
Haba ïakren pat bad ki longkmie ki la pynpaw ïa ka jingsngewsih, namar ba ki la thaw ïa kawei ka Self Help Group bad ki nongïalam jong ka Village Organisation, ha kaba ki la iathuh ba lada ki tnad sorkar ki phah ïa kino kino ki jingpyntip sha ka VO lyngba utei u secretary VEC um ju pynpoi sha ki, kumta baroh ki kam ki shu sep ei.
Ha kaba ïadei bad ka jingleh donbor jong utei u secretary ka VEC hapoh shnong, kawei ka longkmie ka la ïathuh ba man ka por u ju kren khor bad kren tohmet da ki ktien khlem akor, wat ha ka por ba ki dang trei bylla shi spah sngi ruh. La ong ba haba u wan peit, u ju kren tang da ki ktien ki bym long wat tang ban iathuh ruh bad na katei ka daw, kam banse ban phet noh na ïing namar ka jingsheptieng ban leit wad jaka sah kat shaba ka ïoh bad ha kine ki sngi ka la hap ban leit sah noh ha Mairang da kaba shu shong wai ha ïing ki briew.
Na ka liang kitei ki rangbah bad ki longkmie ki la kyrpad ïa ki bor ba halor, ba kin tuklar lem ha kaba ïadei bad katei ka kam, khnang ba ka shnong ka thaw kan shong suk shong saiñ bad ki nongshong shnong kin ïoh jingmyntoi lang kum ba ïoh lem kiwei.
