Nongstoiñ, Nailar 13: Ka jingleh bym suidñiew jong ka Meghalaya energy Power Distribution Corporation Limited ïa ki post lait ha ka thaiñ Rambrai, ka long ka jingma lada jia ba ki post lait kiba la bam da ka sarang bad pei thliew na trai kin kyllon ha madan.
Ki riew rangbah katei ka thaiñ haba ïakren bad u nongthoh khubor, ki la ong ba ki don bun tylli ki post lait ha katei ka thaiñ kiba la jan kyllon bad kiba la shu neh, tang namar ba ki don ki sainar kiba la teh pyrkhing ha khyndew hynrei kitei ki sainar kin ym lah ban bat lada jur ka lyer.
Kumta ki la kyntu ïa ka ophis MePDCL ba ka dei ban phah maramot noh kloi katba lah ïa ki post lait kiba la jan dkut haman la ki jaka, khnang ba ki paidbah kin lait na ka jingmynsaw lada jia ba ki kyllon.
Nalorkata ki la ong ruh ba ka jingpynlip bording man la ka sngi jong ka MePDCL ha katei ka thaiñ, ka la buh ha ka jingeh kaba khraw ïa ki paidbah khamtam ïa kiba bylla ha ki karkhana ot dieng bad bun kiwei kiwei ki kam kiba pyntreikam da ka bording electric.
Kitei ki riew rangbah ki la ong ruh ba ha ka jingshisha lada ka sorkar ka la pynbeit ban don ka load shedding, ka la dei ban pynbna paidbah lyngba ki bor District bad ki bor District kin sa pyntip sha ki nongsynshar shnong, khnang ba ki paidbah kin ym duh kam.
Ki la ong ba ha ka por ba ki mih na ïing ban leit bylla ha ki karkhana ot dieng, ka bording kam pat lip ynda la sdang trei kumba katto katne kynta ka bording ka la lip bad ka meh satang ynda la janmiet. Katei ka jinglip ka bording ka pynduh kam haduh katta katta ïa ki nongbylla.
