Ri Bhoi, Jylliew, 20: Ki ar tylli ki sengbhalang na Ribhoi kiba kynthup ïa ka Ri Bhoi Youth Welfare Organization bad ka Confederation of Ribhoi People (CoRP) ki la kynnoh ba ka don ka jyrsieh bamsap kaba shyrkhei halor ka jingpyntrei ïa ka Asian Development Bank (ADB) Fund lyngba ka Megalaya Health Systems Strengthening Project (MHSSP) ba la khlieh da u Ram Kumar S. kum u Project Director.
U kyrwoh ba la soi da u President ka RBYWO u Bah Ban Kharnaior, u Secretary u Bah Keny Nongrum bad u Finance Secretary ka CoRP u Bah Shining Kyntla ki la ong, “ka katkum ka jubab ba la ïoh pdiang lyngba ka RTI na ka tnad ka Koit ka Khiah halor ka jingpyntrei ïa ka Asian Development Bank (ADB) Fund lyngba kawei ka Agency ba la tip kum ka Megalaya Health Systems Strengthening Project ba la khlieh da u Ram Kumar S. kum u Project Director naduh ba sdang ïa ka project kaba kot 50 klur ïa ki Civil Work Infrustructure ha baroh kawei ka Jylla katkum ki kot ki sla ngi shem ba ka don ka jingbamsap ba shyrkhei ha ka jingai kam sha ki Contractor kaba pyni uwei u briew u ïoh kam haduh 20-60 tylli ki kam naduh kiba rit haduh kiba kot da ki klur.”
“Kane ka jingkhlieh hi u Project Director bad ki ophisar ka Health Engineering Wing ban leh ïa ki Estimate ka la long lai shah tam ka jingïohnong khlem kino kino ki shah khate khamtam ka jingpyntrei ïa ka Operation Theatre (OT) ha Bhoirymbong CHC na ka liang u Executive Engineering HEW la mang T. 84,00,000.00 lak katba ïa ka Bill la siew haduh T. 10,476,036.19 klur sha u Kontraktor Bah BD Marbaniang kaba lah tam haduh T. 20 lakh na kaba la mang,” la kynnoh kine ki ar seng.
“Kane ka jingtei katkum ka jingjurip bad jingthew jing ngi ka don 30 phew la 40 phew phut bad ngi la phah kheiñ ha ki Architect ka jinglut kan long hapoh 25 lak. Ho,oid ngi sngewthuh haba pyntrei ne shim kam donkam ban ïohnong hynrei kane kala long palat na ka jingmang bad ka jingïohnong kaba lai shah bad ka kdew shai ba ka don ka jingpyndonkam bakla hapoh ka jingpyntrei ïa ka pisa paidbah ba la shim ram na ka ADB,” ki ar seng ki la kynnoh shuh shuh.
Haba kynthoh ba ka jingshim ram ka Sorkar ka long tang ban pynhun ïa ki khun khatduh, ki ar seng ki la kynnoh da kaba ong, ‘katkum ka jingsngewthuh ka jong ngi ka jingshim ram lyngba ki World Bank kaba nyngkong ka long ban kyntiew ïa ka Jylla ha ki liang bapher bapher, ka baar pat ngi i ba ka dei ka jingpynhun ïa ki khun khatduh ka Sorkar da kaba ai kam da ki phew tylli ha ki katto katne ngut khlem da ñiewtang shuh ïa kiwei pat ki Kontraktor kiba sah khlem kam kumba lah kdew ha ka Link ka MHSSP ba u Bah BS Syiem u ïohkam haduh 50-60 tylli. Kaba lai, ngi shem ba ka don ka bamsap ba shyrkhei lyngba ki Civil Work Infrastructure.”
Ki la pyntip ba ki la pan jingshai na ka ophis Project Director Dr. N. E Kharsohnoh kaba dang shu shimti shen kum ka Project Director jong ka MHSSP halor ka jingtei ïa ka OT Bhoirymbong bad ka jingshna pynbha ïa ka Umsning CHC kaba kot 4,07,40,906.22 klur bad kaba ladep ban pyllait pisa T. 1,35,80,302 klur bad ong ruh ba katkum ka jingshem jong ki ïa ka jingtrei dang leh tang ïa ka Ground Floor bad First Floor bad la mut ban iehnoh khlem da shna pyndep kumba lah mang.
“Na ka liang jong ngi ngin ap ka jubab na ka Project Director ban ïaid da kiwei pat ki lad ban ujor halor ka jingpyndonkam bakla ïa ka pisa paidbah. Lada ka Sorkar Jylla ka kloi ban ai CBI kumba leh ka Sorkar Assam kin don beit ki ophisar ki ban shah kem halor kane ka project bad kiwei ki project lyngba ki World Bank, ADB Fund namar ngi shem ba wat ban shna ïa kata ka VIP Toilet ha Mairang la mang pisa haduh T. 25 lak da ka tnat Tourism katkum ka Tender,” la byrngem kine ki ar seng.
