Kynnoh ka VPP ba shim kabu ki nongkhaïi doh nabar jylla ban pynïap ïew ïa ki trai jylla

Shillong, Nohprah, 17: Ka Voice of the People Party (VPP) ha ka sngi Thohdieng jong ka taïew baladep ka la dawa ïa ka Sorkar Jylla ba kan shimkhia bad ban peitngor ïa ka jingshim kabu jong ki nongkhaïi doh nabar ka jylla kiba kwah ban pynïap ïew ïa ki nongkhaïi doh trai jylla da ka jingïarap hi jong ki runar napoh ka jylla kiba donkti ha kane ka kam.
Ha ka dorkhas ba la phah sha u Myntri ka tnat Animal Husbandry &Veterinary Bah Alexander L. Hek ba la soi da u General Secretary ka VPP u Dr. Ricky A.J Syngkon u la ong, “ha kane ka aiom mynta ka jur bha ka ka jingdawa ïa ka doh bad kan long ruh ka aiom kaba pynïoh kamai bha ïa ki nongrep. Ha kum kane ka aiom, ki nongkhaïi doh nabar ka jylla ki shim kabu ban bsut hapoh ïew ban pynïaid ïew ïa ka doh kaba wanrah nabar ka jylla bad khynñiat sharud ïa ki nongdie doh trai jylla. Kane ka dei ka kam be-aiñ jong ki nongkhaïi doh nabar jylla.”
“Ki lah ban don ruh katto katne ki runar trai jylla kiba shimkabu ban don kti lang ha kane ka kam ïa kaba ym lah ban len bad ngi kyntu ïa ka Sorkar ban leh eiei pyrshah ïa kine ki nongleh kam be-aiñ,” la dawa ka VPP.
Ka VPP ka la kynnoh ruh ba ki nongkhaïi doh kiba nabar ka jylla ki la pynjem ïa ka dor khnang ban khñiot ïa ki nongdie doh trai jylla ha ka die ka thied.
“Ka jingwan rah ïa ki syiar nabar ka jylla ka buh jingma ïa ka koit ka khiah bad ka jingshngaiñ jong ki nongbam, namarba kam don kano kano ka sienjam ban tohkit bniah ïa ka koit ka khiah jong ki syiar kiba wanrah nabar ka jylla,” la kynnoh ka VPP.
Ka VPP ka la kyntu ïa ka Sorkar ba kan tuklar noh mardor bad ban shim ïa ki lad kiba pyrkhing khnang ban khanglad ïa ka jingwanrah ïa ki syiar bad kiwei kiwei ki mrad nabar ka jylla na ka bynta ban bam doh khnang ba kan long ka jingmyntoi ïa ki nongri mrad bamdoh na ka jylla lane da kaba buh ïa ka dor khnang ba kan pynmyntoi hi ïa ki nongri mrad bamdoh na kane ka jylla.
“Shuh shuh, la ai jingmut ba ka jingtuklar jong ka Sorkar ha kaba ïadei bad ka Insurance, Subsidy halor ka jingbuh ïa ki Farm ri mrad bamdoh bad ban oh khajna ïa ki mrad bamdoh ba wanrah nabar jylla khnang ba kan kyntiew ïa ka jingïoh khajna bad ba kan ïada bad kan pynshlur ïa ki nongri mrad bamdoh jong ka jylla,” la bynrap ka dorkhas.