Shillong, Jymmang 26: Ka Congress hynne ka sngi palei kala kynnoh ba ka National Peoples Party (NPP) kaba ïalam ïa ka Sorkar Jylla, ka khlem shim satia ïa ka Building Permission (jingbit ban tei ïing) na ka Meghalaya Urban Deve lopment Authority (MUDA) ban tei ïa ka Ophis ba thymmai jong ka Party.
“Ka NPP ka khlem shim satia ïa ka Building Permission na ka MUDA ban tei ïa ka Ophis jong ka Party ha Shillong” kynnoh u samla Banphiralang Basaiawmoit, Vice President ka Meghalaya Pradesh Youth Congress (MPYC) haba ïakren bad ki lad pathai khubor.
Kat kum ka jingong jong u “Ka long kaba kyndit ba ka jingtei kala jan dep mynta kumba 70% hynrei ka NPP kam pat shym jingbit ban tei ïa ka Ophis na ka MUDA, kaba dei kawei na ki jingdonkam haba thmu ban tei ïa kano kano ka jingtei hapoh jaka sor”.
U Myntri Rangbah ka Jylla Conrad Kongkal Sangma uba dei u National President ka NPP, ula buh ïa u mawnong rim ha ka 1 tarik Nailur 2020 ban tei ïa ka Ophis ba pura jong ka NPP hajan Polo.
Haba pynpaw ba kane hi ka dei ka jingpyndonkam bakla ïa ka bor da kane ka party kaba bat ïa u lakam ka jing synshar, u samla Banphiralang ula ong “La i kumba ki borkhmih (MUDA) ruh kila leh matlah ïa kat kane ka jingtei kaba heh kaba dang ïaid mynta tang ban pynsngewbha ïa ki kynrad hynrei katba ïa ki riew paidbah pat, wat tang ban shu tei pyniar ïa ka Ïing khlem ka jingbit, ki bor khmih kila wan ban tynjuh bad ai notice lem bad ka kuna”.
“Ngi, kum ki samla ba don jingkitkhlieh jong ka Congress, ngi kwah ban tip ba kumno ba lah ban tei ïa kane ka jingtei khlem ka jingbit ? bad balei ba ka MUDA kam shym la ai notice, balei ruh ba ka MUDA ka phai tap ïala ki jong ki khmat bad mano ruh ba bthah ïa ki ban leh kumne” ula ong.
Une u Nongïalam ki samla ka Congress ula ong watla kane ka jingtei (Ophis NPP) ka lah ban dei ka jingtei kaba skhem naba ka dei ka jingtei na ka bynta ki kynrad ym jong ki riew paidbah kum ka ISBT bad ka Meghalaya Legislative Assembly “Hynrei ngi ngeit, ba ka NPP ka dei ban ïaid kat kum ki kyndon aiñ ha kaba shim shuwa ïa ka jingbit shuwa ban tei ïa kane ka Ophis”.
U Secretary ka Meghalaya Pradesh Congress Committee (MPCC) Bah Manuel Badwar ula ong ba ym dei shuh ka por ban shu ïai shah ïa ka jingpynkheiñ kyndon haba ong “La donkam ban ïa buh jingkylli noh da ki samla bad ki paidbah baroh halor ki kam jong ka NPP” ula ong.
Haba kylli, u bah Manuel ula ong ba ka Congress kan sa thoh sha ka MUDA halor kane ka kam. “Hooid, ki bor khmih ki dei ban leh eiei halor kane naba ka dei kawei ka aiñ kaba treikam ïa baroh. Lada ka treikam ïa ki riew paid bah, ka dei ruh ban treikam ïa ki Party kiba heh bad ki Kynrad ba don bor” ula ong haba pynpaw ba ka Congress kan sa nang lum ïa ki jingtip bad leh eiei halor kane ka kam.
