Shillong, Ïaiong 01:U President ka Nationalist Congress Party (NCP) bad MLA ka Gambegre u Saleng A Sangma hynne ka sngi thohdieng ula kynthoh ïa ka Congress ba ka dei ka “khawpud” da ka jingbym shimkhia ban pynbeit ïa ka jingïakajia khappud hapdeng ka Jylla Meghalaya bad Assam.
“Haba baroh artylli ki Jylla (Meghalaya bad Assam) ki dang shah synshar ha ka Congress, kim shym la shimkhia satia ne wat ban shim ïa kano kano ka sienjam” ong u Saleng haba ïakren bad ki nongthoh khubor. Ula buh jingkylli ruh halor ka jingbym lah jong u Myntri Rangbah barim ka Jylla ban pynbeit ïa ka jingïakajia pud.
U Saleng ula ong “Ha ka por ba u Dr Mukul Sangma u dang long Myntri Rangbah, balei ba u khlem shimkhia ne leh eiei:? shaei ba u don? balei u sngap jar jar? Shaei ruh jah u Bah D.D.Lapang, balei ba ki khlem leh eiei? shaei jah u Captain Williamson Sangma, shaei u Bah BB Lyngdoh-kila dei ban leh eiei lada long kumno kumno ruh”.
Halor ka jingkynnoh jong ka Liang Pyrshah (All India Treinamool Congress) ba ak Sorkar MDA ba ïalam da ka NPP kala shu shim rai kyrkieh da kaba ïasoi ïa ka soskular Memorandum of Understanding (MoU) ban pynkut ïa ka jingïakajia ha ki 6 tylli ki jaka napdeng ki 12 tylli kiba ïakajia bad ka Assam, une u Nongïalam ka NCP ula ong “Ka jingkam jong u Dr Mukul ban pynbeit ïa ka kam khappud kam shym la urlong satia”.
“Phi kynmaw haba ka KSU ka dang pyrta ïa ka jingdawa ILP, pynbeit khappud, u (Dr Mukul) ula kren haba shai ba un sa pynbeit noh ïa ka kam khappud tang ha ki katto katne por hynrei kane kam shym la urlong satia” ula ong.
Haba iaroh ïa ka rai jong ka Sorkar MDA ban pynbeit ïa ka jingïakajia, u Saleng ula ong ‘Ka dei ka kam kaba la sahteng da ki phew phew snem bad ym shym la don ruh ba shim ïa kano kano ka sienjam ban pynbeit ïa kane ka kam. Hynrei kane ka Sorkar kala pyni ïa ka kam ïa kaba nga da iaroh bha hynrei ngam lah pat ban ong la kala shim ïa ka lynti kaba dei ne kaba bakla hynrei kila leh eiei pat”.
“Da long kumno kumno ruh, kane ka Sorkar kala nud ban leh eiei bad mad ïa kaei kaban jia hadien habud. Kin sa don bun ki jingmudui mukotduma, kin sa don bun ki jingpyrshah bad shibun ki jingkynnoh halor kane ka kam namar ka dei ka kam ïakajia ïa u pud u sam” ula ong.
Halor ak jingpyrshah ïa ka jingïasoi MoU bad ka Assam, une u Heh ka NCP ula ong ba ula ïohi ha kawei na ki lad pathai khubor ka Assam ba u Myntri Rangbah ka Assam Himanta Biswa Sarma ula ong ‘Ka MoU kam dei satia ka rai kaba khatduh namar ka dei ka Ïingdorbar Parliament kaban shim ïa ka rai bad nga ngeit skhem ba ka Sorkar India bad ki artylli ki Jylla kila da bishar bha ïa kaei ka sienjam bala shim. Lada mih kaei re kaei na kane ka MoU, nga tharai ba u Myntri Rangbah un sa leit ai jingkren ha Parliament”.
