Shillong, Nohprah 07: Ka khubor ba la ïoh na ki pulit la ïathuh ba kawei ka longkmie na Phersakandi (WGH) ka la phah ïa ka jingujor ba ha ki 2 snem ba la leit u hep kynsi jong ka u Karimul Islam ha ryngkatlang bad ka tnga jong u bad kawei pat ka longkmie ki la leit ban trei hapoh ka company kaba ha Noida (UP). Hadien pat u Karimul Islam u la phet krad na ka jaka trei hadien ba u la shim ïa ka pisa kaba long T. 2 lak kum ka advance na u Manager jong ka company, ha kaba la kynnoh ba une u Manager u la ktah kti ïa ka ba ka dei ban mih noh na katei ka jaka tat haduh ba la siew ïa ka pisa.
Ha kaba ïadei bad kane na ka liang jong ka nongujor ka la ong ba u hep kynsi jong ka ula byrngem ban pynshitom ïa ka ha kaba ïadei bad kane kam.
Ha kawei pat ka jingjia na ka liang jong ki pulit ki la ïathuh ba u Tejrang K Marak u la phah ka jingujor ba ha ka 28 tarik mynta u bnai ha ka por kumba 2 baje mynstep, ki runar bym lah ban ithuh ki la tuh ïa ka thuk thuk jong u kaba don u nombar AS-18P-1384 napoh ka jaka sah jong u kaba ha Haluapara (NGH).
