Mawkyrwat, ‘Nailur 24 : Ka Khasi Students’ Union (KSU) South West Khasi Hills District ha ryngkat bad kiwei ki sengbhalang ka District, ki la pynlong ïa ka jingïalang paidbah ha ka shnong Rangthong ban pynshai paidbah halor ka jingthmu jong u Syiem Maharam ryngkat ka Dorbar Hima ban die ïa ka jaka ha Wahmula sha ki shipai khappud.
Ha kane ka jingïalang la don lang ruh da u Myntri jong ka shnong Rangthong u bah Kitborlang Nongrem ryngkat kiwei de ki riew rangbah, ha kaba ki la ai shibun ki jingpynshai halor ka jingthmu jong u Syiem jong ka Hima Maharam ban jaka ktem shipai ba la ïoh na ki seng bad na u Myntri jong ka shnong Rangthong.
Namarkata, ka seng ka wer ïa u paitbah ban mih sha khmat ban pyrshah ïa ka jingthmu jong u syiem bad ka dorbar hima, bad ki dei ban weng noh syndon iaka jingthmu ban die iaka jaka sha ki shipai namar kan ktah ia u khun u hajar jong ka hima maharam.
Haba ai jingkren ha ka jingïalang, u bah Forwardman Nongrem uba dei u President jong ka Khasi Students’ Union (KSU) South West Khasi Hills District, u la ai khublei ïa ki agent jong ka sorkar kiba la ai jingtip ha ka por kaba biang ha shwa ba ka por kan dier noh.
U la ong dei lyngba ki Agent jong ka sorkar kiba wan ban pynbiej da kumne kumtai ba sa ioh ïa ka jingtip ba u Syiem ka Hima Maharam ryngkat ka Dorbar Hima ki thmu ban die duh ia ka jaka sha ki shipai kaba dei ka jaka rep jaka riang jong u khun u hajar jong ka hima maharam, bad dei halor kane ka nongrim ka seng ka la ieng ban pyrshah namar kan ktah ïa u khun u hajar u ba rep ha katei ka jaka, ym tang kata hynrei kan ktah ruh ïa ka pateng ka ban sa wan.
