Shillong, Nailur, 04: Ka Khun Hynniewtrep National Awakening Movement (KHNAM) ka la rai ban thoh noh shen sha u Chief Secretary ka Jylla u Bah Donald P. Wahlang ban leh da kaba tyngeh halor ka jinglap jong ka halor ka jingkynnoh ba ka don ka jyrsieh bamsap ïa ka pisa paidbah ha ka tnad Secretariat Administration Department (SAD).
“Ngi la lum lang ïa ki jinglap jong ngi bad ïa kata ngin sa aiti ha u Chief Secretary ban shim ïa ki sienjam kiba donkam halor kane ka kam,” ong u Working President ka KHNAM u Bah Thomas Passah ha ka jingïakren bad ki lad pathai khubor ha ka sngi Palei.
U la kyntu ruh ïa ki nongthaw aiñ ba kin shimkhia ïa kane ka mat bad ban ïakren ha ka Iingdorbar Thawaiñ ka ban sa long. Katkum ka jingong jong u, ka KHNAM ka thmu ban pynthikna ïa ka jingtreikam kaba khuid bad kaba sai bad ka jingkitkhlieh ha ka jingtreikam jong ka Sorkar da kaba thad madan ïa ka jyrsieh bamsap ha ki rukom treikam.
U Bah Passah u la pyntip ba ka KHNAM ka la pan da ka Right to Information (RTI) na ka tnad SAD bad lap ïa ka jingbym ïahap ha ka rukom ai jingtip ha kaba ïadei bad ka jingsiew ïa ka bainong sha ki nongtrei bylla sngi.
“Ka paw ba ka don ka jingpyrshang ban buhrieh ïa ki jingtip, hynrei ka jingshisha ka sah ba kine ki nongtrei ki ïoh ïa ka tulop manla u bnai katkum ka Minimum Wages, ryngkat bad ka pisa ba la mang da ka tnad Pla tyngka. Ka jingbym ïahap kaba paw ha ka jingshisha ba haba la mang pisa da ki lak tyngka na ka bynta ban siew tulop ïa kine ki nongtrei hapoh ka tnad SAD, ïa ki kyrteng jong kine ki nongtrei kim lah satia ban ai ha ka jubab RTI. Ka tnat SAD ka kam ba kine ki kyrteng kim don bad kane ka pynsuba sniew. Ngi don ka jingsuba ba ka lah ban don ka jyrsieh bamsap ban pyndonkam bakla ïa ka pisa u paidbah, ha kaba ïa ka pisa ba la mang ban siew ïa ka bainong sngi ka la poi pynban sha ka pla jong ki katto katne ki briew,” u la kynnoh.
U nongïalam ka KHNAM u la kynnoh ruh ba ka tnad SAD ka la pynkheiñ ruh wat ïa ka Regular Casual Workers Scheme, 1996. Nalor kata, ka la paw ruh ka jingbym kohnguh wat ha ki tnad treikam ka Sorkar.
“Katkum ka jubab jong ka SAD ïa ka jingkylli RTI jong ngi, 60 ngut ki briew kiba la rung ha u snem 2013 bad kiba la kynjoh 10 snem ha ka jingshakri kiba la ïoh ïa ka kyrdan Regular Casual Worker (RCW) ha u snem 2023 bad 2025. Hynrei, ki jinglap jong ngi ki pyni ba ïa kine ki 60 ngut ki nongtrei la thung lyngba ka merit-based examination bad ki ïoh ïa ka jingsiew da ka Fixed Pay, kaba long markhongpong ha ka jingkdew jong ki nongtrei Casual hapoh ka RCW Scheme. Shuh shuh, la ïathuh ba ki nongtrei RCW ki ïoh ïa ka tulop kaba kham duna ban ïa ki nongtrei Non-RCW, ka bym ïahap bad ki jingmyntoi ba la khmih lynti kiba ïadei bad ka kyrdan RCW,” la ong u Bah Passah da kaba bynrap “haba ngi la wad jingshai, ka SAD ka la ong ym don pisa. Kane ka la buh ïa u dak jingkylli uba heh, lada ka pisa kam don, balei ïa kine ki nongtrei la ai ïa ka kyrdan RCW naduh nyngkong?”
“Na kine ki jinglap, ngin sa lum lang ïa baroh ki jingshem jong ngi. Nalor kata, ngi la pan ruh ïa ki Supplementary RTI ban tih bniah shuh shuh bad ban sei madan ïa ki jingpyrshang ban thungkam sop sop marwei bad ban siew bainong,” u la bynrap shuh shuh.
