Shillong, K’ Lyngkot 21: Ka Khasi Hills Autonomous District Council (KHADC) ka la kynnoh ïa ka North East Security Services (NESS), ka security agency ba shimet, ba ka la ïaid sha lyndet ba ka la pyndonkam bakla ïa ka trading licence jong ka na ka contract ban ai ki jingshakri ha ka National Institute of Technology (NIT) kaba ha Sohra.
U Chief Executive Member (CEM) jong ka KHADC, u Bah Tony Winston Lyngdoh, u la pyntip ba ka district council ka la ai ïa ka trading licence sha ka NESS ban ai ki jingïada bad jingshngaiñ ha Kendriya Vidyalaya, Laitkor.
“Haba, la ai ïa ka laisen khaïi na ka bynta ban ai ki jingïada bad jingshngaiñ ha Kendriya Vidyalaya, ngi la da pynpaw da kaba shai kdar ïa ka jaka ban treikam kane ka company,” ong u Bah Lyngdoh.
U CEM u la ong ba ka NESS ka la pyndonkam ïa ka photocopy jong ka syrnot ba la ai da ka council ban leh ïa ka GST return bad ban aiti ïa kane sha ka NIT Sohra ban aplai ïa ka jingai jingshakri ki lad jingïada ha katei ka jaka.
U Bah Lyngdoh u la ong ba kane ka kompeni ka khlem apply ïa ka trading licence ban ai ki lad jingïada ha NIT Sohra. “Ka KHADC ka ai ïa ka trading licence halor ka nongrim jong ka work order ba la ïohpdiang da ka kompeni,” bynrap u CEM.
Halor kane na ka liang ka council kan pan ïa ka jingjubab bad ka jingpynshai na ka NIT Sohra naba kumno la ai ïa ka tender sha ka NESS haba kam shym don ïa ka trading licence kaba treikam.
