Shillong, Nohprah 15 : Ka Seng Hynniewtrep National Liberation Council (HNLC) ka la pynpaw ka jingsngewkhia jur bad pynrem jur ruh ïa ki bor synshar ka Khasi Hills Autonomous District Council (KHADC) kiba leh bym salia bad leh bym suidïiew ïa ki bor Hima da kaba pynslem ban ai ïa ka Sanad na ka bynta u Maremdor Syiem bad shimti pura ïa ka khet Syiem ha ka Hima Sohra.
Kat kum ka kyrwoh na ka seng HNLC ka Kur bad ki paid ka Hima Sohra da kawei ka sur ki la jied bad pynbna ïa u Maremdor Syiem ban shimti ïa ka khet Syiem hadien ka jingkhlad noh jong u pa’iem Freeman Sing Syiem kaba long kat kum ki riti dustur jong ki bor Hima ha ka synshar ka khadar.
“ ïa kane ka rai ym shym la rai kyrkieh ne mushlia da kino kino ki seng sainpyrthei hynrei ka dei ka rai kat kum ki riti ki dustur jongka Hima Sohra” ong u General Secretary ka Seng HNLC u bah Sainkupar Nongtraw.
Kane ka jingpynslem ban ai ïa ka Sanad ka la buh ïa ka synshar khadar ha ka jingkulmar bad jingeh khamtam ha kaba ïadei bad ka jingpan Grant, ki No Objection Certificate bad kiwei kiwei ki kam kiba donkam ïa ka jingsoi jong u Syiem.
Ka HNLC ka la pynpaw ba ka Sohra ym dei ba kam don Syiem namar ïa u Maremdor la dep jied bad pdiang da ka kur bad ki paidbah bad kaba sah ka long tang ban ïoh ka jingithuh bad ai Sanad da ka KHADC.
Ka Sanad ym dei ba ka pynkup bor hynrei dei ba ka pynithuh ïa ka bor kaba la don lypa lyngba ki riti ki dustur jongka Hima kaba ïai bteng naduh mynshwa haduh mynta. Kumta ka HNLC ka kyntu jur ïa ka KHADC ba kan rai kyrkieh khnang ba ka synshar khadar kan ïaid beit ïaid ryntih biang ha ka hima Sohra.
Ka HNLC ka maham ruh ba kane ka jingïai pynslem ka pynpaw ba ka KHADC ka ïuhroit ïa ki riti dustur synshar Hima Sima bad ka long kum ka jingpyntlot bor ïa ki bor synshar tynrai. Kynmaw ki paid nong Sohra kim kwah ïa kano kano ka jingshim kabu hynrei dei ba ki burom ïa ki riti ki dustur tynrai jongka synshar khadar jongka Hima Sohra kumta ki kwah ban ïoh ka jingithuh ïa u Syiem uba ki la jied da ka jingmynjur lang.
