Kynnoh ka DS ba rep synsar be-aiñ ïa ki nongrep na Thadmynri ha Forest Plantation ka JHADC

Jowai, Nohprah, 07: Ka Dorbar Shnong Namdong lyngba ki nongialam shnong ha ka sngi Saitjaiñ ka aiti da ka dorkhas ba khatduh ha u Chief Forest Officer jong ka JHADC bad sha u Dy. CEM ka JHADC halor ka jingbym lah jong ka ophis ban pynduh pyndam ïa ka jingrep synsar jong ki briew na ka shnong Thadmynri hapoh kane ka (forest) plantation kaba ka dorbar shnong Namdong ka la ai sha ka JHADC Jowai naduh ka 5 tarik, Naitung, 1980. Namar ha ka por ba ai ïa kane ka khlaw ka la don lypa ïa ki dieng sal kiba heh bad ba bun hynrei katba nangmih ki sngi ki snem la sdang ban pom pathar ïa kine ki dieng sal bad hadien ba la jan lut kine ki dieng mynta pat da ki spah ngut ki nongshong shnong ka Thadmynri ki la hiar ban rep synsar ha kane ka plantation, kumta ka shnong namdong ka la ujor bunsien sha u CEM bad sha u Chief Forest Officer ban dawa ban pynkut noh ïa kane ka jingrep synsar beaiñ jong kine ki briew ha kane ka jaka hynrei kane kam shem la trei kam satia wat lada ujor katno katno ruh.
Kumta ha ka 5 tarik mynta u bnai ka Dorbar Shnong lyngba ka Dorbar paidbah ka la shim ïa ka rai ba khatduh ban ujor ïa kine ki briew sha ophis ban pynkut noh syndon ïa kane ka jngrep beaiñ ha kane ka jaka ha shwa ka 16 tarik Nohprah, 2024, bad ban thung biang da ki dieng bad lada ka ophis kam lah ban leh kumba la ïakut ha ka agreement kan bha ba kan aiti biang ïa kane ka jaka sha ka shnong Namdong ban peit bad sumar.
Halor kane lada ka ophis kam lah ban leh eiei ha lane shwa ka 16 tarik Nohprah, 2024 ka Dorbar Shnong kan leh eiei da kaba tyngeh halor kane ka khlaw.
Namar kine ki briew na kane ka shnong Thadmynr ki la wan ban shong shnong sha kane ka jaka lynga ka jingaibor ka shnong Namdong Elaka Nongjngi la ai lang ïa ki, ki jaka rep ki khlaw bam dieng bad ki jaka shna ïing hynrei katba nangmh ki sngi kine ki briew na kane ka shnong Thadmynri ki la sdang ban pynjot ïa kane ka khlaw (forest) da kaba rep synsar, bad kaba pynlyngngoh shuh shuh ïa ka shnong Namdong ka Raij Namdong bad ka Elaka Nongjngi mynta ba kine ki briew ki la kwah pat ban leit sha ka elaka Nartiang kaba la pyllong ïa ka Elaka Nongjngi ban ïeng pyrshah ïa kane ka jingleh buit tuh jong kine ki briew tang ban pynjot ïa ka imlang sahlang pynkut ka kyrwoh na ka sur u paidbah nongshong shnong.