Shillong, Nailur, 16: Ka Congress ha ka sngi Thohdieng ka la kynnoh ba ka jingtei ïa ka Ïingdorbar Thawaiñ ba thymmai ha New Shillong Township ka dap da ka jyrsieh ba shyrkhei bha.
“Ka jyrsieh bamsap ka shyrkhei bha hapoh ka Jylla Meghalaya, lada ïakren ha manla ki tnat treikam ka Sorkar phin lap tang ïa ki jingleh thok bad ïa ka bamsap bad u Myntri Rangbah jong ngi un pyrshang ban ïada, ha ka jaka ban pynshitom ïa kiba donkti,” ong u President jong ka Meghalaya Pradesh Youth Congress (MPYC) u Samla Adrian L. Chyne Mylliem ha ka jingïakren bad ki lad pathai khubor.
“Dang shen, ki la don ki khubor ba la pathai da ki lad pathai khubor ba bun bha ki tnat treikam ka Sorkar kiba la paw pyrthei ha kaba leh bha, kata, naduh ka tnat Kam Pohing (Police), ka tnat ka Koit ka Khiah (ka jingpynlut pisa na ka bynta ka jingïakhun thma ïa ka khlam COVID-19), ka tnat Pule Puthi, ka tnat Sam Bording, ka tnat Social Welfare bad ka tnat PWD,” la kynnoh une u nongïalam ki samla ka Seng Congress.
“Dang katto katne, u Myntri Rangbah u la kdew ba ka tnum pyllun (Dome) jong ka Ïingdorbar Thawaiñ ba thymmai ka la khyllem na ka daw ka jingkhia palat ka jingtei. Hangne ngi kwah ban buh jingkylli ïa u Myntri Rangbah ban sei paidbah ïa ka kaiphod tohkit jong ka IIT Guwahati khnang ba ngin dup lah ban ïohi ïa ka jingshisha ha lyndet ka jingkhyllem jong ka tnum pyllun,” u la ong.
Haba kynnoh ba u Myntri Rangbah u Conrad Sangma pyrshang ban ai jingïada, u President ka MPYC u la ong, “ïano u Myntri Rangbah u pyrshang ban ïada da kaba aidaw ba ka jingkhyllem jong ka tnum pyllun ka dei ka daw ka jingkhia palat ka jingtei? Ha ka jaka ban pynshai, u Myntri Rangbah u la kyntait da kaba kyrpad ïa kiwei ban da wad jingtip bha shwa ban kynnoh. Ngi kwah ban ong biang sa shisien ba ka don ka jyrsieh bamsap kaba shyrkhei bha ha ka jingtei ïa ka Ïingdorbar Thawaiñ ba thymmai ha kaba la ïohi ba ka don ka jingphiel ha ka ‘Technical Design’ ïa kaba la hap ban shim jingkitkhlieh da u Kontraktor.”
“Hato u Engineer ka PWD uba peit ïa ka jingshna ïa ka Ïingdorbar Thawaiñ u leh aiu katba dang ïaid shaphrang ka jingtei ïa uba ngi ïohi hadien ba u bunkam ban ïalap na ka bynta ka party jong u Myntri Rangbah,” la kynthoh u nongïalam ka MPYC.
U la ong, ka dei ka Uttar Pradesh Rajkiya Nirman Nigam (UPRNN) kaba la aiti pateng (sub-contract) ïa kane ka projek sha ka Badri Rai Company (BRC).
“Ngim lah shuh ban sngewthuh ba kumno ka BRC ka leh ïa kane ka projek baroh kawei katba ka NIT jong ka PWD ka kdew shai ba tang 40% jong kane ka jingtrei la ai trei pateng (sub-contract),” la kynthoh ka MPYC.
“Ïa ka BRC, la kyntait da ka PWD naduh ba sdang, katkum ka jingsngewthuh jong, ba kam lah ban kotbor ban shimti ïa kane ka kam, hynrei ki (BRC) ki la rung pynban na kyrpong,” la kynnoh u Bah Mylliem bad bynrap, “ïa ka BRC la kham noh mynsiem da ka Sorkar MDA ha kaba la aiti bun tylli ki projek hapoh ka jylla khamtam kiba projek ba kongsan kum ka jingshna ïa ka Iew Polo ba thymmai, ka jingshna ïa ka surok Bajengdoba, ka jingshna ïa ka Stadium ha Tura bad ka jingshna ïa ka ophis treikam ba thymmai jong ka MTC ha Police Bazaar. Haduh ngin don ka jingshngaiñ ïa kane ka Contractor (BRC) haba ngi ladep sakhi ïa ka rukom pyntrei ïa ka tnum pyllun ka Ïingdorbar Thawaiñ ba thymmai,” la ong shuh shuh u nongïalam ka MPYC.
Haba kylli, u nongïalam ka MPYC u la ong ruh ba wat u Lamphang jong ka Ïingdorbar Thawaiñ u dei ban shim ïa ka jiingkitklieh halor kane ka jingjia.
