Kynnoh ka BJP ba ka dei tang ka jingïashun saiñpyrthei ka NPP pyrshah ïa u Bernard Marak

Shillong, Naitung, 24: Ka Bharatiya Janata Party (BJP) Meghalaya State Unit ha ka sngi u Blei ka la pynrem jur halor ka jingleit khynra jong ki Pulit ïa ka Farm House jong u Bernard Marak kaba don ha Edenbari ha ka janmiet Sngi Thohdieng ka taiew baladep.
“Nga ladep ïakren bad ki riewdonburom bad ki riewpawkhmat na Tura bad na ki shnong kiba marjan bad halade nga shem ba u Bernard Marak u la shu shah pharep bad shah pynjah burom. Ka paw ba u kylla long u lanot ha ka jingïashun saiñpyrthei pyrshah ïa u,” ong u State President ka BJP u Bah Ernest Mawrie ha u kyrwoh ba la phah sha ki lad pathai khubor.
“Ka building kaba la shah khynra ka dei kaba lai mala, ka kamra kaba sha khrum ka dei kaba la ju pyndonkam kum ka jaka bam paidbah ïa kaba la aiwai na ka bynta ki jingdonkam. Ka mala kaba nyngkong ka don 30 kamra ha kaba la pyndonkam kum ki kamra thiah. Ka mala kaba ar ka dei kaba la pyndonkam kum ka Hostel na ka bynta ki khynnah kiba wan na ki longing baduk na kylleng ki bynta jong ka rilum Garo. Kine ki khynnah rit ki la shong la sah ha kane ka jaka naduh ba la wan lynshop ka khlam bad u Bernard u la ai jingïarap pisa ruh ïa ki haba ki donkam. Napdeng ki khynnah kiba la shimti noh da ki Pulit, san ngut ki dei kiba dang rit ka rta kiba la kyrshan hi nadong shadong da u Bernard bad kiba pule ha Edenbari School bad ha Auxilium Convent School ha Tura. Kumjuh ruh, ïa ka nongsumar bad ïa kine ki khynnah la rah noh da ki Pulit. Ki shi kurim kiba pynïaid ïa ka jaka die jingbam hapoh kane ka phyllaw ki la shah rah ha ki Pulit,” ong u Bah Mawrie.
“Katkum ka jingtip kaba nga don, ki briew kiba la shah kem ha ki Pulit na ka Resort ha ka janmiet jong ka 22 tarik, Naitung, 2022 ki dei kiba shim wai ban sah ha kane ka iing. Kumjuh ruh, ki kali ba la kurup da ki Pulit ha kane kajuh ka janmiet ki dei hi jong kine ki nongshim wai,” la ong une u President ka BJP Meghalaya State Unit.
U la ong ruh ki nongshong shnong jong ka Tura ki ju leit kai barabor sha kane ka Resort manla kaba kut taiew na ka bynta ban leit bam khana bad ban sah miet. “Kiba sah basa ha kane ka Resort ki dei kiba wan na ki longing kiba donburom bad ban ong ba kane ka Resort ka dei ka ‘ktem awria’ ka long ka bym lah satia ban pdiang. Ïa ki khynnah rit kiba wan na ki longing kiba duk la pyni ha rukom kaba bym dei. Kumba la pyntip ba ïa kane ka Resort la pynïaid la jan lai snem kynthih bad kam pat ju don satia kano kano ka jingujor,” la bynrap u Bah Mawrie.
“Ka long kaba shai ba kine ki jingkynnoh ki long tang ban pynjah burom ïa ka BJP bad ïa u State Vice President bad u Convener jong ka Garo Hills u Bernard Marak na ka daw ba u la pawkhmat bha ha rilum Garo khamtam ha Tura South,” la pynksan u Bah Mawrie.
“Lah ruh ban kdew ba ha ka 21 tarik, Naitung, 2022 shi sngi shwa pynlong ïa ka jingkhynra, ki samla jong ka NPP ki la tah da ki poster ha ki kynroh jong ka sor Tura kiba la kynthoh pyrshah ïa u Bernard Marak. Ka long ruh kaba shai ba kane ka dei tang ka jingïashun saiñpyrthei naba wat ïa ka ing kmie jong u Bernard Marak ruh la khynra khlem kano kano ka Warrant. Kane ka dei thik tang ka jingpyndik,” la kynnoh une u nongïalam ka BJP.
“Ha ka jingïakren bad u Bernard Marak u la ïathuh ba mynta u don hapdeng ka jingshep tieng ïa la ka jong ka jingim. Nga kyrpad ïa ka Sorkar ba kan ïada ïa ka jingim jong Bernard Marak bad ban weng lut ïa baroh ki jingkynnoh ba la pynngat pyrshah ïa u kiba la ktah ïa ka burom jong ka party,” la ong u Bah Mawrie.
Ka BJP Garo Hills ka la pynrem jur halor ka jingshah pynlong sohpdung jong u State Vice President u Bernard N. Marak uba long ruh u MDC jong ka Tura.
Ha u kyrwoh, ka paty ka la kynnoh ba kane ka jingkhynra ïa ka Farm House jong u Bernard ka paw shai ba ka dei tang ïashun saiñpyrthei da ka NPP khamtam u Myntri Rangbah ka Jylla u Conrad Sangma namar ka jingsdang tlot bor ha rilum Garo khamtam ha Tura Constituency.
“U Bernard Marak u dei uba ju kren pyrshha ïa ka bamsap hapoh ka GHADC bad manla ka por u ju kren shalor kane bad u ju ai ruh bun ki jingtip sha ki paidbah ha kaba ïadei bad ka bamsap da ka Executive Committee ba la ïalam da ka NPP bad kane ka la pynlong ïa u Conrad Sangma bad ki dkhot jong ka Party (NPP) ban shun ïa u Bernard Marak. Kine ki jingkynnoh pyrshah ïa u ki dei kiba lamler bad kiba shu thaw,” ong ka BJP.
“Ym don ktem awria lymne ym don thei dakaid napdeng kito kiba la shah rah ha ki Pulit ha kato ka miet. Wat ki arngut ki khynnah rit ba la rah da ki Pulit ki dei kiba sah ha ka Farm, iwei na ki, i dei iba dang leit skul bad kiwei ki dei kiba don jingduna ha ka bor pyrkhat ha kaba u kpa jong ki, u dei uba trei bylla sngi ha kane hi ka Farm. Ka dei tang ka jingbuit jong ki Pulit bad ka NPP ban pynjah burom bad ban pynsniew dur ïa ka Party (BJP,” ong shuh shuh u kyrwoh.
“Ngi pynrem jur ïa ka jingleh donbor jong ki Pulit bad ïa ki kam buit poh jong u nongïalam ka NPP u Conrad Sangma pyrshah ïa u nongïalam jong ngi bad jong ka BJP baroh kawei,” ong shuh shuh ka BJP na rilum Garo.