Shillong, Naitung 25: Ka Achik Krima Council (AKC) ka la dawa ba dei ban wengnoh ïa u DTO ka South Garo Hills u Tengkrang Sangma halor ki jingkynnoh ba u la leh ki kam bamsap. Katkum ka jingkynnoh katei seng ka la ong ba ka la dep ban ujor lah bunsien da ki paidbah ba utei u ophisar ba u la donkti ha ka jingpynïeng beaiñ ïa ki check gate bad u la bam klop.
U Vice President ka Achik u Greneth M Sangma ha ka kyrwoh u la ong, “Ka jingleh u DTO ka la wanrah ka jingeh ïa ki paidbah bad bad bun ruh kiba la ïoh ïa laisen ñiah kali bad RC. Katkum ka jingtalasi ba manla ka sngi da ki Motor Vehicle Inspector (MVI) bad ki pulit ka la nang pynsngewsih ïa ki paidbah kiba la long kum ki sohpdung ïa kane ka jingleh ka ophis DTO.”
Ka seng ka la ong ruh ba la dep ban ujor da ka ejahar ha Bangmara Police Station halor ka jinglum pisa kaba khlem ïohbor kaba khlem ka receipt ne ka hukum kaba dei. Katkum ka Achik ka la don ka jingpynïeng ïa ka check gate kaba beaiñ ha Masigat ha shilynter ka surokbah ban buh ruh ïa ka weighbridge ha kaba ka jinglum pisa jubor ka la jur bha. “Kaba kyrpang ka long ba u DTO u la dawa beaiñ ka pisa kumba T. 2 hajar na ki kali barit. T. 15 spah na ki trok bad T. 500 spah ïa ki kali pickup,” ong katei ka kynhun.
